හරියට හෝ වැරදියට kiss කරනවා කියල දෙයක් නෑ. ඕනම kiss එකක ඒ අදාල හැගීම අනෙක් පාර්ශ්වයට සන්නිවේදනය වෙනවා නම් ඒ kiss එක නිවැරදියි කියන්න පුළුවන්. වැරදි සන්නිවේදනයක් යනවා ඒක අවුල්. මේක පුද්ගලයාගෙන් පුද්ගලයාට වෙනස් වෙන කාරණයක්. ඒත් අපි නිකංම තොල් දෙක උලාගන්නවා හරි හපා කනවා හරි කියන එකට වඩා kiss එකක් ගැන සාවධාන වුනොත්, ඒක තවත් සංවේදී කරන්න පුළුවන් විදි ගැන හිතුවොත් ඒ අත්දැකීම වඩා විචිත්ර වූත් ආස්වාදනීය වූත් එකක් කරන්න පුළුවන්.
එක්කෙනෙකුගේ ෆැන්ටසිමය හාද්දක් තව කෙනෙකුට භයානක අත්දැකීමක් වෙන්න පුළුවන්. ඒත් ඒක හාද්දක් වෙන්න නම් දෙපාර්ශ්වයටම ඒ සිපගැනීමේ හැගීම දැනෙන්න ඕන. ඒකෙන් රසවත් වෙන්න ඕන. ඊට සහභාගි වෙන්න ඕන.
පහුගිය කොවිඩ් කාලෙ සිපගැනීම තහනම් වුනා. ඒක ආදරය වෙනුවට මරණය දනවන සංඥාවක් වගේ වුනා. අපිට නැවත දෙතොල් විකසිත කරලා ආදරයෙන්, අනුරාගයෙන් සිපගන්න නිදහස ආවෙ අවුරුදු ගානකට පස්සෙ.
චර්යාවේදයේ විශේෂඥයන් කියන විදිහට අපි ඇයි මේ විදිහට තව කෙනෙකුගේ දෙතොල් සිපගන්නෙ කියන එක ගැන නිශ්චිත හේතුවක් හිතාගන්න බෑ. ඒක අපිට ආස්වාදය දනවන්නෙ ඇයි කියන එක ගැන පැහැදිලි කිරීමක් නෑ. ඇත්තටම සිපගැනීමක් ඒ තරම් ආශ්චර්යමත් සහ ආස්වාදනීය වෙන්නෙම ඒ හින්දයි. ඒකට කිසිම තේරුමක් නැති හින්දයි. අපි තවත් කෙනෙකුගෙ දෙතොල් අතර, එයාගෙ ඛේටයෙන් තෙත්වෙමින්, තොල්වල අණසකට නතුවෙමින්, ඇතැම් විට දිවෙන් මුව තුල ස්පර්ශ කරමින් ගතවෙන දිව්යමය මොහොතක් තියෙනවා. ඒ තමයි kiss කරන මොහොත.
2021 සෙක්ස් ඇන්ඩ් මැරිටල් ජර්නලයේ පළවුනු වාර්තාවක් අනුව ඔයා සහ ඔයාගෙ සහකරුවා හෝ සහකාරියගේ සම්බන්ධය එකිනෙකාට කොයිතරම් තෘප්තිදායකද කියන එක රඳා පවතින්නෙ ඔයා අනෙකාට කොයිතරම් ආදරය කරනවද කියන එකම මත නෙමෙයි. ඔයා කොයිතරම් අනෙක් කෙනාව සිපගන්නවද කියන කාරණය මත. සිපගැනීමක් තරම් අපි එක්ව පැවතීම ගැන ස්තුතිවන්ත වෙන්න පුළුවන් වෙනත් ආකාරයක් නෑ.
Kiss එකක් වඩා ආස්වාදනීය වෙන්නෙ කොහොමද කියන එක ගැන විවිධ සොයාබැලීම් කරලා තියෙනවා. ඒ පිළිබඳව ලෝකයේ විවිධ රටවල මිනිස්සු හෙළිදරව් කළ කාරණා අනුව kiss එකක තෘප්තිය පිළිබඳව අපිට සිතා බැලිය හැකි කාරණා කීපයක් තියෙනවා.
1. ඔබේ සහකරුවා/සහකාරියගේ කැමැත්ත.
ඕනම ඉන්ටිමේට් ස්පර්ශයකදි වැදගත්ම දේ තමයි අනෙක් පුද්ගලයාගේ අනුමැතිය. මේක කොලේක ලියලා, වචනයෙන් ස්ථිර කරලා ගන්න එකක්ම නෙමෙයි. නමුත් ඒක ස්ථිරව දැනගත යුතු දෙයක් වෙනවා. කෙනෙක්ව සිපගන්න කලින් එයා ඒ හැගීමෙන් ඉන්නවද කියල අපි දැනගන්න ඕන. නැත්තං ඒක බලහත්කාරයක්.
ඇත්තටම සිපගන්න කලින් ඒක අහන එක වුනත් අනුරාගය වැඩිවෙන දෙයක් වෙන්න පුළුවන්. ඒක ගොඩක් අයට ගෞරවය පිළිබඳ හැගවීමක් වෙනවා. ඒකෙන් kiss එකක් වඩාත් උණුසුම් වෙන්න ඉඩ තියෙනවා.
2. Kiss කරන වෙලාවෙ සිහියෙන් ඉන්න.
ආදරයක මුල් කාලයේදී kiss එකක තියෙන අවධානය, අනුරාගය කාලයත් එක්ක වෙනස් වෙනවා. අපිට හුරුපුරුදු පෙම්වතා හෝ පෙම්වතිය සිපගන්න අතර තුර තව නොයෙක් තැන මනස ඇවිදිනවා. අපි එතන ඒ kiss එකේ පවතින්නෙ නෑ. ඒක තමයි සිපගැනීමකට කරන්න පුළුවන් ලොකුම අගෞරවය.
තව කෙනෙක් සිපගන්න විටෙක දැනීම, ඇසීම, දැකීම, සුවඳ විඳීම, සහ රස බැලීම යන සියලු ආකාරයෙන් අපි ඒ අත්දැකීම තුල පවතින්න ඕන. සමහර අය මේක විස්තර කරනවා සිපගැනීම යනුම භාවනාවක් බඳුය කියල. එක රිද්මයකට සමපාත වන හුස්ම, අවට සියල්ල නතර වන මොහොත, අපි අනෙකා තුලට ගිලී යන නිදහස මේ හැම දෙයක්ම විඳින්න දැනෙන්න අපි සාවධාන වෙන්න ඕන.
3. දෙතොල්වලට බොහෝ වේලා රැදෙන්න ඉඩදෙන්න
උදේ ඇදෙන් නැගිටිද්දි නළලතට දෙන පුංචි හාදුවක් වෙන්න පුළුවන්, පැය ගණන් දිග අනුරාගී සිපගැනීමක් වෙන්න පුළුවන් මේ දෙකටම පොදු කාරණයක් වෙන්නෙ හැකිතරම් වෙලා දෙතොල් ස්පර්ශයේ රැදෙන එකේ වැදගත්කමයි. හාද්දක් දිගුවෙන තරමට ඒ හාදුවේ මහිමය වැඩියි. අපේ දොතොලින් අපි අනෙකා එක්ක සම්බන්ධ වෙනවා. එයාගේ රිද්මය හා සමපාත වෙනවා. ඒ හුස්ම විඳින්න ගන්නවා. මේ ‘සින්ක්’ එකට වෙලාව ගතවෙනවා. සිපගැනීමක අරමුණ වෙන්නෙම අනෙකා සමග එකම රිද්මයකට සමපාත වීමයි. මොහොතක් එක්ව පැවතීමේ ශෘංගාරයයි.
Kiss එකකදි අපේ ශරීරයේ ’බොන්ඩින් හෝර්මෝන’ නිදහස් වෙන්න පටන් ගන්නවා. හැම හාද්දක්ම අපිව අනෙකාට වඩාත් ළංකරනවා. කෝර්ටිසෝල් අඩු කරනවා. සතුටේ හෝමෝනය වන ඩෝපමින් මුදාහරිනවා. අපිව යුෆෝරියාවක අතරමං කරනවා.
4. දිව ගැන වැරදි වැටහීමක් නැත්නම් සෙමෙන් ඉඩ දෙන්න.
දිවෙන් සිපගැනීමට සාමාන්යයෙන් කියන්නෙ ෆ්රෙන්ච් කිස් කියලා. ඒක ඉතා මනරම් සිපගැනීමක්. ඒත් සමහරු ඒකට අකමැති වෙන්න පුළුවන්. ඔබේ සහකරුවා/සහකාරිය ඊට කැමති බව හොඳටම දන්නවා නම් ඔයාට පුළුවන් දෙතොල් සිපගන්නා අතරතුර දිව සෙමෙන් අනුරාගී ලෙසින් ඇගේ හෝ ඔහුගේ මුව තුලට ඇතුල් කරන්න. ඔබ දෙන්නාම කැමති වඩා ප්රචන්ඩ වූ ආකාරයෙන් දිව පාවිච්චි කරමින් සිපගැනීමට නම් එහි කිසිම නරකක් නෑ. අනපේක්ෂිත පරිදි දිව මුව තුලට විත් කරන දඟයත් ආස්වාදනීය වෙන්න පුළුවන්.
සිපගැනීමකදි දිවෙන් මුව තුල සැරීම ඔබ අතර බැඳීම තවත් වැඩි කරනවා. ඒක විනිවිදීමක්. හරියටම සංසර්ගයක් වගේම කිළිපොලා යන හැගීමක්.
දිවෙන් සිපගැනීම් කරනවා නම් අනෙත් කෙනා එය කොයි ආකාරයකින් කොයිතරමකින් රස විඳින්න ලෑස්තිද කියන එක දැනගෙන ඉන්න එක වැදගත්.
5. එකිනෙකාගේ ඛේටයෙන් මත්වෙන්න.
දිවෙන් සිපගැනීම හෙවත් ෆ්රෙන්ච් කිස් එකෙනුත් එහාට ගිහින් අපිට පුළුවන් එකිනෙකාගේ කෙළ හුවමාරු කරගන්න. සමහර විට ඒක සිපගැනීම් පාඨමාලාවේ සෑහෙන කාලයක් අධ්යනයෙන් පසු කරන්න ඕන වැඩක් වෙන්න පුළුවන්. ඒත් ඒක ඉතාම දැඩි තෘප්තියක්, ආස්වාදයක් දෙන කාරණයක්. අනෙකාගේ කෙළ පවා ආදරයෙන් රස විඳීම කියන්නෙ අපි කොයිතරම් දැඩිව, ගැඹුරින් අනෙකාව බාරගන්නවද කියන බව දැනවීමක්.
6. ශරීරයේ අනෙක් කොටස් අමතක කරන්න එපා.
ඔබ දෙතොල් සිපගන්නා අතර තුර අත්වලින් මොනවද කරන්නෙ කියන එකත් වැදගත්. අත්වලින් ඔබ දැඩිව අනෙකාව වැළඳගෙන ඉන්නවා වෙන්න පුළුවන්. ඇය හෝ ඔහු වඩා කැමති එබඳු දැඩි සිරගත සිපගැනීමකට වෙන්නත් පුළුවන්.
නමුත් ඔබට තව බොහෝ දේ කරන්න පුළුවන්. ඇගේ හෝ ඔහුගේ වඩා සංවේදී කලාප ඔබට ඇගිලිවලින් ස්පර්ශ කරන්න පුළුවන්. සමහරුන්ගේ කන්පෙති, සමහර විට ගෙල යට, සමහර විට පිට පුරා දිවෙන ඇගිලි ඇයව කුල්මත් කරන්න පුළුවන්. දෙතොලින් බැඳී ඇති අතර ඇගිලි සැරිසැරිය යුතු ආස්වාද කලාප ගැන හොඳින් තේරුම් ගන්න. ඔබේ පෙම්වතාගේ හෝ පෙම්වතියගේ ශෘංගාර කලාප හඳුනාගැනීම කියන්නෙ ඒකට.
7. හපනවා නම් මෘදුව හපන්න.
සමහරු කැමතියි සිපගන්න අතරෙ දෙතොල් සපන්න. එය හැගීම් තවත් උත්සන්න කරන්නක්. වැදගත්ම දේ අනිත් කෙනාත් ඒ තරමට උණුසුම් වූ හැගීමක ඉන්නවද කියල දැනුවත්ව මේක කරන එකයි. නැත්තං ඔක්කොම කණපිට හැරෙන්න පුළුවන්.
දොතොල් සැපීම මෘදුව කළ යුත්තක්. මේක ඩ්රැකියුලා වර්ගයේ සපාකෑමක් නෙමෙයි. ශෘංගාර චුම්බනයක් තවත් අනුරාගී ඉසව්වට කැඳවීමක්. අනෙකාව කිළිපොලා යන පරිදි මෘදු සැපීම් කරන එක තරමක් පුහුණු විය යුතු කාරණයක්.
8. දෙතොල් තෙත්ව, නැවුම්ව තබාගන්න.
වියළි පැළුණු දෙතොල්වලින් සිපගැනීම තරම් අනුරාගය බිඳින සුළු දෙයක් නැති වෙන්න පුළුවන්. ඊට වඩා යමක් වෙන්න පුළුවන් නම් ඒ තමයි මුඛයෙන් දුර්ගන්ධයක් වහනය වීම. මේ නිසා සිපගැනීමකට කලින් දෙතොල් තෙත්ව, මෘදුව පවත්වාගන්න. ඒ තෙත්බව තමයි kiss එකක පදනම. ඒ වගේම චුයින්ගම් එකක් හරි හපලා මුව නැවුම්ව තබාගන්න. කොයිතරම් උදේට දත් මැදලා ආවත් ගතවෙන කාලයත් එක්ක දුර්ගන්ධයක් ඇතිවෙන්න ඉඩ තියෙනවා. ඒ වගේම අනෙකාට නැවුම් හුස්ම විඳින්න පුළුවන්, එහි දැවටෙන්න තැවරෙන්න පුළුවන් ශෘංගාරමය සුවඳක් මුවින් වහනය වෙනවා නම් කොයිතරම් රමණීයද?
9. සිපගැනීම ගැන ප්රතිචාර විවෘතව බාරගන්න.
ඔබ කෙනෙකුට නරක සිපගන්නෙක් වෙලා තවත් කෙනෙකුට විස්මිත සිපගන්නෙක් වෙන්න පුළුවන්. ඒක ඉතාම පුද්ගලික දෙයක්. ඒ නිසාම සිපගැනීම ගැන විවෘතව අනෙකා එක්ක කතාබහ කරන්න. එයා තවත් කැමති නොකැමැති ආකාර ගැන දැනගන්න. හාදුව තව තවත් ගැඹුරට අනුරාග ඉසව් වලට ගෙන යන්න.
මේ වගේ දේවල් විවෘතව අනෙකාට කියන මට්ටමට ඔබේ සම්බන්ධතාවය පරිණත කරගන්න. හිතේ දේවල් හංගගෙන ඉන්න වේදනාවෙන් අත්මිදෙන්න.
Kiss එකක් කියන්නෙම විවෘත බවේ, නිදහසේ, බාරගැනීමේ සංඥාවක්. ඒ බව සිහිපත් කරමින් නැවත නැවත සිපගන්න.
