අද අන්තර්ජාතික සිපගැනීමේ දවසයි. සිප ගන්නත් දවසක් ඕනද කියල ලංකාවෙ හැම එකටම නෙගටිව් කට්ටිය අහවි. ඔව්, හැම සාමාන්‍ය දේකටම විශේෂ දවසක් ඕන. ඒ අපි සාමාන්‍යයි කියල දකින දෙයෙහි සුවිශේෂත්වය දකින්න. හැගීමක් නැතුව දෙන සුපුරුදු හාදුවක අසිරිමත් බව සිහිපත් කරන්න. මේ සිපගැනීමේ දිනය පටන් ගන්නෙ එක්සත් රාජ්‍යයෙන්. 2000දි වගේ. ඊට පස්සෙ මේක ලෝකෙ පුරාම ව්‍යාප්ත වෙනවා.
මේ දවසෙ අරමුණ සිප ගැනීමක දැනෙන ආදරය, සතුට සහ නිරෝගී බව සිහිපත් කරන එක. ඔව්, හැම සවිඥානක සිපගැනීමක්ම ඔබව නිරෝගී කරනවා. ඔබට ආදරය දනවනවා. ඔබට ඉතාම සමීපතමයන්ගේ උණුසුම, ස්පර්ශය සහ රස දනවනවා.
මේ සිප ගැනීම ඕනම ආකාරයක එකක් වෙන්න පුළුවන්. අනුරාගයෙන් බැ‍‍‍දෙන ප්‍රංශ හාදුවක පටන් කම්මුලට දෙන සුබ පැතුම් හාදුවක් දක්වා ඕනම චුම්බනයක් වෙන්න පුළුවන්. ඒත් ඒ හැම එකක්ම කියන්නෙ ආදරය. බැඳීම.
හාදුව කියන එක ලෝකෙ ප්‍රචලිත වුනේ රෝමානුවන් නිසා. රෝමානුවන්ට හාදු වර්ග තුනක් තිබුන.
- ඔස්කියුලම් – කම්මුලට දෙන මිත්‍රශීලී හාදුව
- බැසියම් – දොතොලට දෙන ආදර හාදුව
- සැවියම් – මුවෙන් මුව දෙන අනුරාගී හාදුව
ඔබ කවුරුන් කොතැනක කොයි ආකාරයෙන් සිප ගන්නවාද කියන එක මත රෝමයේ සමාජ තත්වය සළකුණු වුනා. අපි අද නිතර කතා කරන ෆ්‍රෙන්ච් කිස් කියන වචනය නිර්මාණය වුනේ පළවෙනි ලෝක යුද්ද කාලෙ ඇමරිකානු සහ බ්‍රිතාන්‍ය සොල්දාදුවන් අතින්. තමන්ගේ රටවල ගැහැණුන්ට වඩා ප්‍රංශ කාන්තාවන් සිප ගැනීමේදී වඩා අනුරාගී තාක්ෂණයක් පාවිච්චි කරන බව මේ අය අත්දැක්කා. ෆ්‍රෙන්ච් කිස් කියන එක ප්‍රංශ ජාතිකයන් විසින් හඳුන්වා දුන් එකක් නොවුනත් සියවසකට එහා පටන් ප්‍රංශ ආදරවන්තයින් සිප ගන්නා ආකර්ශනීය, අනුරාගී විලාසය නිසාම ඒ ගෞරවය ඒ අයට බාරදෙන එක නිවැරදි වුනා.
ආකර්ශනීය කාරණයක් වෙන්නෙ ඉතාම මෑතක් වෙන තුරු ප්‍රංශයෙන් මේ හාදුවට වචනයක් නැති වීමයි. ගැලුෂි කියලා වචනයක් තිබුනත් ඒකෙ තේරුම දිවෙන් දිව සිපගැනීම වගේ එකක්. ඒකත් විධිමත් වචනයක් නෙමෙයි.
හාදු දීම නිසා අපිට අත්වෙන ප්‍රතිලාබ ගොඩක් තියෙනවා. එකක් තමයි සතුටු හෝර්මෝන මුදාහැරීම. මේ නිසා ආතතිකර හෝමෝන වන කෝර්ටිසෝල් අඩු කරනවා.
අනෙත් කෙනා සමග ඇති බැඳීම වැඩි කරනවා. හොඳ සතියකින් යුතුව, හැගීමෙන් පිරුණු හාදුවකට පුළුවන් ඔබේ සම්බන්ධතාව තව අවුරුදු ගානකට ශක්තිමත් කරන්න.
ඒ වගේම කෙනෙක් කොයිතරම් වටිනවාද, ඔහු හෝ ඇය වෙනුවෙන් තවත් කෙනෙක් කොයිතරම් ආදරෙන් බලා සිටිනවද කියන හැගීම දනවන්න හොඳම විදිහක් සිපගැනීම. එක හාදුවකින් ගොඩක් ප්‍රශ්න විසදන්න පුළුවන් වගේම ආත්ම විශ්වාසය, ආත්ම ශක්තිය ගොඩනංවන්නත් පුළුවන්.
සිපගැනීමකදි ඔබේ රුධිර නාල ප්‍රසාරණය වෙමින් රුධිර පීඩනය අඩු කරනවා කියලත් පර්යේෂණවලදි පෙනී ගිහින් තියෙනවා. ඒ වගේම හිස රුදාව වගේ තත්වයන්ටත් ප්‍රත්‍යක්ෂ ඖෂධයක් තමයි හොඳ ආදරණීය හාදුවක් කියන්නෙ. ශරීරටේ ප්‍රතිශක්තිකරණ පද්ධතිය වැඩිදියුණු වෙන්නත් හාදුවක පහස උදව් වෙනවා.
අපේ ලිංගික ශක්තිය, අනුරාගය, ජීවිතය ගැන ආශාව වැඩි කරන්න හාදුවකට පුළුවන්. අපිව ඒ මොහොතට බඳවා තබා ගනිමින් ජීවිතය කොයිතරම් අසිරිමත්ද කියල දනවන්න පුළුවන්.
මතක තියාගන්න. සෙමෙන් සිපගන්න. කිසි දේක හදිස්සියක් නෑ. ලෝකය හාදුවක් ගත වෙන පැයක් හරි නතර වෙලා තියේවි. ඔබ සෙමෙන් සිප ගන්න. අනෙකාගේ හුස්ම විඳින්න. ඒ හුස්මෙන් ඔබේ පෙනහළු පුරවාගන්න. දොතොලතර වෙලෙමින් ගතවෙන්න. වෙන කිසිම දෙයක් ගැන හිතන්නෙ නැතුව ඒ හාදුවේම නතර වෙන්න.
ආදරයට ගෞරවය පුදන්න.
ඉතිං තවත් මේක කියව කියව ඉන්නෙ නැතුව යන්න. ගිහින් සිපගන්න.
