රස්පුටින් ගැන ඉතාම හොඳ යූටියුබ් වැඩක් චාමර සුමනපාල කරලා තිබුන. රස්පුටින් කියන්නෙ දෙවියෙක් යකෙක් කියන තැනින් ගලවලා රස්පුටින් කියන්නෙ ගැමියෙක් මිනිහෙක් කියන තැනට ගේන්න චාමර රුසියානු ඉතිහාසයේ කරුණු ගලපමින් රස්පුටින් මිත්‍යාව පරීක්ෂාවට ලක්කරනවා.
මේ කරන්නෙ රස්පුටින් ගැන තවත් විදිහක ඉතිහාස කරුණු ඇවිස්සීමක්. විශේෂයෙන් රස්පුටින්ගෙ ලිංගික ජීවිතය ගැන විස්තර හොයායාමක්. එතනදි චාමරට වගේ ඇත්තම සොයායෑමේ උවමනාවක් මට නෑ. ඒ වෙනුවට රස්පුටින් ගැන ඉතිහාස සාක්ෂි, කටින්කට එන කතන්දර, විශ්වාස ඇදහිලි හැමදෙයක්ම එකට අරගෙන ඒ මහා ප්‍රබන්ධය රසවිඳින්නයි මෙතන උවමනාව.
ග්‍රිගොරි එෆිමොවිච් රස්පුටින් 1871 ඉඳන් 1916 වෙනකල් කාලයේ ජීවත් වුනා කියල තමයි කියන්නෙ. රස්පුටින් සාන්තුවරයෙක් වගේම යක්ෂයාගේ දූතයෙකුත් වුනා. මේ සයිබීරියානු පිස්සු පූජකයා එයාගෙ අනුරාගය වෑහෙන ඇස්වලින් ගැහැණුන්ව ලිංගික උන්මාදයකට අරගෙන ගියා. නිකොලස්ගේ හිමොෆීලියාව වැළඳුනු දරුවට ප්‍රතිකාර කිරීමෙන් ට්සාර් පවුලේ විශ්වාසය දිනාගත්තා. එක් තීරණාත්මක පරිච්ඡේදයක රුසියානු ඉතිහාසයේ සංධිස්ථානයක් සලකුණු කළා.
රස්පුටින්ට තිබුනා දිගට වැවුණු කිළුටු කොන්ඩයක්. ඒක මැදින් බෙදලයි තිබුනෙ. කැපී පෙනෙන ලොකු නහයක්. අපිලිවෙල දිග රැවුලක්. ඒ වගේම විනිවිද දකින, ගැඹුරු, උන්මාදනීය ඇස් දෙකක්. රස්පුටින් නෑවෙ ඉතා කලාතුරකින්. ඒක හින්දම එයා ළඟින් යද්දි ගඳක් දැනුනා. එයා කෑම කෑවෙ අත්වලින්. රස්පුටින්ව දැකපු සමහරු කියන්නෙ එයා උසයි කියල. සමහරු කියන්නෙ එයා කොටයි කියල. සමහරු කියනවා එයා දෙවෙනි නිකලස්ගෙ බිරිඳ ඇලෙක්සැන්ඩ්‍රාගෙ පෙම්වතා කියල. රස්පුටින්ට වැඳුම්පිදුම් කරපු ගැහැනියක් කියන විදිහට රස්පුටින් බෙලහීනයි.
බටහිර සයිබීරියාවෙ ගමක රස්පුටින් ඉපදෙන්නෙ. ඒ ගොවි පවුලක තුන්වැනියා විදිහට. රස්පුටින් පොඩි කාලෙ ඉඳන් වැඩිපුර ස්වභාව ධර්මය එක්ක ගත කරනවා. මිනිස්සු එක්ක කතාබහ අඩුවෙන්. රස්පුටින්ගෙ මුල්කාලෙ ගැන විස්තර හරිම අපැහැදිලියි. ඒත් එයා මිනිස්සුන්ගෙ ලෙඩ සුවපත් කළ බව කියනවා. රස්පුටින් කියන නම පවා පටබඳින්නෙ ගැමියන් විසින්. ඒකෙ තේරුම නිදහස්කාමී කියන එක. සදාචාරය තුට්ටුවකටවත් මායිම් නොකර ඉන්ද්‍රිය තෘප්තිය හඹායනවා කියන එක.
රස්පුටින් අවුරුදු 18දි බැඳලා ළමයි තුන්දෙනෙක් හදනවා. එයා හොඳටම බොනවා. හොඳටම යාඥා කරනවා. හැබැයි පාදිලියෙක් නෙමෙයි. අවුරුදු 20දි ගොවිපොලේ වැඩකරමින් ඉන්න අතරෙ රස්පුටින්ට කන්‍යා මරියාතුමිය දර්ශනය වෙනවා. එයාගෙ මේ අමුතු විජ්ජා ගැන හොයන්න ගමේ පූජකයා ලෑස්ති වෙද්දි රස්පුටින් ගම අතෑරලා යනවා.
එයා දෙවියන්ගෙ පනිවුඩකරුවෙක් විදිහට ගමෙන් ගමට යනවා. ග්‍රිගොරිගෙ තාත්තා එක වෙලාවක කියනවා ‘මිනිහා වන්දනාකාරයෙක් වුනේ කම්මැලිකම හින්ද. වෙන මොකක්වත් හින්ද නෙමෙයි’ කියල. රස්පුටින් අවබෝධය හොයාගෙන යනවා. එයා විශ්වාස කරන්නෙ දෙවියන් කරා ළංවිය හැකි හොඳම මාර්ගය දිගටම පාපයේ ගැලීමයි කියල. විශේෂයෙන්ම සෙක්ස් මාර්ගයෙන්. ඒ වගේම කළ පාපය ගැන පසුතැවීමෙන්.
රස්පුටින්ගෙ දුව මරියා පස්සෙ ලියනවා රස්පුටින්ගෙ තාත්තාට කවදාවත් රස්පුටින්ව තේරුම් ගන්න බැරිවුනා කියල.
රස්පුටින්ගෙ ලිංගික හැකියාව ගැන කතා ඇත්ත නම් රස්පුටින් ප්‍රමාණයෙන් සහ වික්‍රම පෑ හැකි කාලයෙන් කියන අංශ දෙකෙන්ම වැඩකරුවෙක් වෙලා ඉඳලා තියෙනවා. මේ හැකියාවන් දෙවියන් විසින් එයාට දීපු දේවල් විදිහට එයා විශ්වාස කළා. ඒ වගේම රස්පුටින් ඛිලිස්ටි කියන නිකායෙ සාමාජිකයෙක් බවට පත්වෙනවා. ඒක ශෘංගාරය සහ ශෘංගාරය ආශ්‍රිත දේවලින් ආධ්‍යාත්මිකත්වය හොයාගෙන යන නිකායක්.
මරියා රස්පුටින් ලියන විදිහට ‘රස්පුටින්ගෙ කාන්තා බැතිමත්තු ඔහුගේ ශිෂ්නය වන්දනා කරනවා. ඒකට ලිංගිකමය සහ මිත්‍යාමය ඇදහිලි ආරෝපනය කරනවා. කොහොමටත් ඒක අසාමාන්‍ය ලිංගේන්ද්‍රියක්. ප්‍රාණවත් වුනාට පස්සෙ අඟල් 13ක් විතර දිගයි. හැඟීම් ඇවිස්සුනාට පස්සෙ ඇදහිලි ගැන සිහියක් නැති වෙනවා. සහභාගි වෙන හැමෝම ඕර්ජි එකක් නැත්තං සමූහ සම්භෝගයක් අරඹනවා. මේ වගේ දේකට පස්සෙ තාත්තා පැය ගානක් භාවනා කරනවා. එයාගෙ අභ්‍යන්තර මනස කිසියම් හෝ කැළඹීමකට ලක්වුනාද කියල පරීක්ෂා කරනවා’
රස්පුටින් එයාව හැඳින්නුවෙ ‘හෝලි ස්ටාර්’ කියල. එයාගෙ නිදන කාමරය ‘ශුද්ධ දේ අතරිනුත් පාරිශුද්ධ වූ’ තැනක් වුනා. එයා එයාගෙ බැතිමතියන්ට කිව්වෙ මාංශය විඳින්න කියල. ආගමික් ස්තෝත්‍ර කියන අතරෙ ඔවුන්ගේ පියයුරු හුරතල් කරමින් රස්පුටින් ඔවුන්ව ලිංගික-ආධ්‍යාත්මික එක්ස්ටසියකට අරන් ගියා. රස්පුටින් එක්ක සෙක්ස් කළා කියල ඒ ගැහැණුන්ගෙ සැමියන් උරණ වුනේ නෑ. රස්පුටින් එක්ක සෙක්ස් කිරීම දෙවියන් විසින් පනවන ලද පව්සමාකිරීමේ ක්‍රියාවක් හැටියෙන් ඒ ගොල්ලො විශ්වාස කළා.
රස්පුටින්ට පෙම්වතියන් දහස් ගානක් හිටියා කියල විශ්වාස කරනවා. ඒ අතර ගැමි කෙල්ලන් වගේම වංශවත් කාන්තාවනුත් ඉන්නවා. ඒ හැමෝම රස්පුටින්ට දෙවියෙකුට වගේ බැතිමත් වුනා. රස්පුටින් ගමකට එද්දි ගැමි කෙල්ලො එයාගෙ පාද ළඟ වැද වැටුනා. ‘ග්‍රිගොරි පියතුමා, අපේ ගැලවුම්කාරයා’ ඒ ගොල්ලො මැතිරුවා.
ඒත් රස්පුටින් කිව්වෙ එයා වංශවත් ගැහැණු එක්ක යහන්ගත වෙන්න වඩා කැමතියි කියල. ඒ මොකද ඒ අයගෙ සුවඳ වඩා හොඳ හින්ද. රස්පුටින්ට ලැබුනු මේ අවධානයෙන් එයාගෙ නිල් ඇස් ඇති සුදු කෙස් ඇති ගැමි බිරිඳ කණස්සල්ලට පත් වුනේ නෑ. ‘එයාට හැමෝටම ඇතිතරම් තියෙනවා’ ඇය කියනවා.
රස්පුටින්ව මරන්න කීපවතාවකම උත්සාහ කරනවා. එකවරක් ගණිකාවක් වන්දනාවෙ යන විදිහට ඇවිත් රස්පුටින්ගෙන් සල්ලි කීයක් හරි ඉල්ලනවා. කාසි කීපයක් ගන්න සාක්කුවට අතදාද්දි ඇය පිහියකින් රස්පුටින්ගෙ බඩට අනිනවා. ‘මං ජේසුස් වහන්සේගේ සතුරා මරා දැම්මා’ කියල ඇය කෑ ගහනවා. රස්පුටින් පිහිය එලියට ඇදලා අරන් අතින් බඩ තද කරගෙන ට්සාර් මාලිගාවට දුවනවා. ඒ රාජකීය මාලිගයේ කෑම මේසෙ උඩ රස්පුටින්ගෙ සැත්කම කරනවා. රස්පුටින් මැරෙන්නෙ නෑ.
‘මං මැරුනොත් ට්සාර්ගෙ ඔටුන්න නැති වෙනවා’ රස්පුටින් කියනවා.
ෆීලික්ස් යුසුපොව් කියන වංශවතා ලෑස්ති කරන පාටියකදි රස්පුටින්ට වහ දාපු වයින් වීදුරු කීපයක් පොවනවා. පොටෑසියස් සයනයිඩ් දාපු කේක් කන්න දෙනවා. ඒකෙන් රස්පුටින්ට කිසි ගානක් නැති වුනාම මාලිගාව ඇතුලෙදි වෙඩි තියනවා. මැරිලද කියල බලන්න ෆීලික්ස් පාත්වෙද්දි රස්පුටින් එයාගෙ බෙල්ල මිරිකලා අල්ලගන්නවා. ෆීලික්ස් උදව් ඉල්ලගෙන පැනලා දුවනවා. රස්පුටින් මිදුලට පැනගන්නවා. ෆීලික්ස් යුසුපොව්ගෙ කණ්ඩායම රස්පුටින්ට පන්න පන්න වෙඩි තියනවා. පොලුවලින් ගහනවා. පිහියෙන් කීපවරක් ඇනලා මොයිකා ඇලට දානවා. අවුරුදු 44දි රස්පුටින් වතුරෙ ගිලිලා මැරෙනවා. ගැමියන් සහ රස්පුටින් පෙම්කළ ගැහැණු මේ මරණය ගැන ශෝක වෙනවා.
රස්පුටින්ගෙ ළමයි තුන්දෙනා ලොකු වෙනවා. දිමිත්‍රි සහ වර්යා රස්පුටින් මැරුනු කාලයේම ආපහු සයිබීරියාවට යනවා. රස්පුටින්ගෙ දුව මරියා රුසියානු නිලධාරියෙක් බැඳලා කැබරේ ගායිකාවක් විදිහට වැඩකරනවා. ඒ අතරෙ රිංග්ලින් සහෝදරයන්ගෙ සර්කස් එකක ‘පිස්සු පූජකයාගේ දුව’ විදිහට සත්තු එක්ක නර්තන ඉදිරිපත් කරනවා. 1945දි ඇමරිකානු පුරවැසිභාවය ගන්නා ඇය තාත්තා ගැන පොත් කීපයක් ලියනවා. එයින් එකක් තමයි, රස්පුටින්- මිත්‍යාව පිටුපස මිනිසා.
