සෙක්ස් ගැන කතා කරනවා කිව්වම ගොඩක් අය අහන ප්‍රශ්නයක් තමයි සෙක්ස් කියන්නෙ කතා කරන්න තියෙන දෙයක්ද කියන එක. සෙක්ස් කියන්නෙ කතා කරන්න නෙමෙයි කරන්න තියෙන දෙයක් විදිහට තමයි බහුතරයක් තේරුම් ගන්නෙ. ඒ වගේම සෙක්ස් කතා නොකළ යුතු දෙයක් විදිහටත් සෙක්ස් ගැන කතා කරන්නෙ සෙක්ස් කරන්න බැරි අය විදිහටත් පිලිගැනීමක් තියෙනවා.

ඇත්තටම සෙක්ස් කියන දේ ශරීරමය වශයෙන් තේරුම් ගත්තොත්, නැත්තං සත්තුත් කරන දෙයක් විදිහට තේරුම් ගත්තොත් අපිට සෙක්ස් ගැන කතා කරන්න දෙයක් නෑ. ඒක හුදු ප්‍රජනන අවශ්‍යතාවය කරගැනීමේ ජීව විද්‍යාත්මක යාන්ත්‍රණයක්. ඒත් සෙක්ස් කියන්නෙ සංස්කෘතියක්, නැත්නම් සෙක්ෂුවලිටි- ලිංගිකත්වය කියන අදහසින් තේරුම් ගත්තොත් ඒක සත්තුන්ට වඩා වෙනස් කාරණයක් වෙනවා. ඇත්තටම කරන්න තියෙන දේකට වඩා කතා කරන්න තියෙන දෙයක් වග වැටහෙනවා. කතා කරන තරමට සෙක්ස් නිර්මාණය වෙන බව තේරෙනවා. ශරීරයෙන් බැහැරව වුනත් සෙක්ස් පවතින වග අවබෝධ වෙනවා. මෙන්න මේ අවබෝධයට අපිට කියන්න පුළුවන් සෙක්ස් ගැන සත්ත්ව සීමාවෙ ඉඳන් මිනිස් සීමාවට ළඟාවීම කියල. සෙක්ස් සංස්කෘතිය ඇතුලෙ තේරුම් ගැනීම.

මේ අර්ථයෙන් සෙක්ස් ගැන කතා කරද්දි ලිංගිකව තෘප්තිමත් වෙන්න කාරණා 05ක් වැදගත් වෙන බව කියවෙනවා.

1. සෙක්ස් කියන්නෙ පාලනයෙන් නිදහස් වීම.

සෙක්ස් කියන්නෙ කරන පොසිෂන් එක, වෙලාව, වාරගණන සම්බන්ධ කාරණයක් නෙමෙයි. සෙක්ස්වල හරියට කරනවා කියල එකක් නෑ. සෙක්ස්වලදි වැදගත් වෙන්නෙ මේ සියලු නිර්ණායකවලින් නිදහස් වෙන එකයි. හරි වැරදි පිලිගැනීම්වලින් මිදෙන එකයි. සෙක්ස්වල තෘප්තිය පවතින්නෙ එකිනෙකාගේ මේ නිදහස පාර්ශ්වකරුවන් ආදරයෙන් බාරගැනීම ඇතුලෙයි.

2. සෙක්ස් කියන්නෙ සෙන්ෂුවල් අත්දැකීමක්.

සෙක්ස් කියන්නෙ පර්ෆෝමන්ස් එකක් නෙමෙයි. පෝර්න්වලින් අපිට ලැබෙන මූලිකම වැරදි පණිවුඩය ඒකයි. සෙක්ස් කියන්නෙ සියලු ඉන්ද්‍රියන් එකතුවෙන අත්දැකීමක්. බහුතරය හිතන් ඉන්නෙ සෙක්ස්වල වැදගත්ම කාර්යය සුරතාන්තයට ළඟාවීම කියල. ඒ කියන්නෙ අවසාන ගෝල් එක. ඒත් සෙක්ස් කියන්නෙ සන්නිවේදනය, ලිහිල්වීම, නිදහස්වීම, බෙදාගැනීම වගේ දේවල් ඇතුලෙ ඉතාම පුද්ගලික අත්දැකීමකට ඇතුල්වීම කියන එක ගොඩක් අය තේරුම් ගන්නෙ නෑ. අරමුණ කරා ළගා වෙනවට වඩා ඒ කරා යන මාවතයි සෙක්ස් වලදි වැදගත් වෙන්නෙ. උනුන් දිහා ඇසින් ඇස බලා සිටීම, ආස්වාදජනක කතාබහ, සුවඳ විඳීම, ශබ්ද නැගීම මේ හැම දේකින්ම තමයි ලිංගික තෘප්තිය කියන එක සමන්විත වෙන්නෙ.

3. සෙක්ස්වල වැදගත්ම දේ සම්බන්ධතාවයයි.

සෙක්ස්වලදි වඩා වැදගත් වෙන්නෙ අපේ ඔලුවෙ තියෙන දේවල් වලින් අයින් වෙලා අනිත් පුද්ගලයා සමග ඒ මොහොතේ සම්පූර්ණ සම්බන්ධතාවයක් පැවැත්වීමයි. අනෙක් පුද්ගලයාව මුළුමනින්ම බාරගැනීමයි. ඒ සිරුර සහ මනස විඳගැනීමයි. අපේ හුදකලාවෙන් පිටතට පැමිනීමයි. සෙක්ස්වලදි වැදගත්ම වෙන්නෙ අපිට කොයිතරම් අනෙක් පුද්ගලයා එක්ක ‘වල්නරබල්’ වෙන්න පුළුවන්ද කියන එකයි. අනිත් පැත්තට එහෙම වල්නරබල් වෙන්න අනෙකාට ඉඩක් නිර්මාණය කරන්න පුළුවන්ද කියන එකයි. ඒකයි සන්නිවේදනය වැදගත් වෙන්නෙ. සන්නිවේදනය කියන්නෙ වචන විතරක් නෙමෙයි. අනිත් කෙනා ආදරය තුල ආරක්ෂිතයි කියන සන්නිවේදනය ලබාදෙන ඕනම ආකාරයක් ඒකට අයිතියි. සෙක්ස් කියන්නෙ කරන දෙයක් නෙමෙයි කතා කරන දෙයක් කියන්නෙ මෙන්න මේ අදහසට.

4. සෙක්ස් හොඳ වෙන්න නම් ශරීරයට ආදරය කිරීම වැදගත්

සෙක්ස්වලදි වැදගත්ම දෙයක් තමයි තමන්ගේ ශරීරය ගැන තියෙන විශ්වාසය. තමන්ගේ ශරීරය විඳීමේ හැකියාව. එමිලි නගොස්කි කියන ලිංගික අධ්‍යාපනවේදිනිය මේ වෙනුවෙන් ‘බොඩි ප්‍රොජෙක්ට්’ කියල ව්‍යාපෘතියක් පවා නිර්මාණය කරලා තියෙනවා. සමාජය නිසා අපේ ශරීරයේ ඇතැම් කොටස් ගැන ඇතිකරලා තියෙන ලැජ්ජාව, හීනමානය ඉවත් කිරීම තමයි ඒකෙ අරමුණ වෙන්නෙ. පර්ෆෙක්ට් බොඩි එකක් කියන මිත්‍යාව අපි තුල ස්ථාපනය කිරීමේ ඉඳන් අපේ ශරීරය ඒ තරම් ප්‍රියමනාප නොවේ හෝ මදි කියන හැඟීමෙන් අපි පීඩා විඳිනවා. සෙක්ස්වලදි මූලිකම නර්තනය පැවරෙන්නෙ අපේ ශරීරයට. ඒක ආත්ම විශ්වාසව පෙරදැරි කරගත් එකක් වෙන්න ඕන. අපේ ශරීරයේ සෑම‍ කොටසක්ම අපිට බාරගන්න පුළුවන් වෙන්න ඕන. ඒ වගේමයි අපි ආදරය කරන අනෙකාගේ ශරීරයත් මුළුමනින්ම සිපගනිමින්, ආදරය කරමින් බාරගැනීම, ඊට ගෞරව දැක්වීම තෘප්තිමත් සෙක්ස් අත්දැකීමක කොටසක්.

5. සෙක්ස් කියන්නෙ අලුත් දේ හොයා යාමයි.

සෙක්ස් කියන්නෙ කොහෙත්ම එකම දේ කිරීමෙන් තෘප්තිමත් වෙන හැඟීමක් නෙමෙයි. ඒ හින්දම අලුත් දේවල් කරන්න, අලුත් දේවල් හොයන්න පෙළඹෙනවා. එතනදි වැදගත්ම කාරණය වෙන්නෙ විනිශ්චයන්ගෙන් තොරවීමයි. පිටත සමාජයේ හොඳ නරක, සෝබන අසෝබන බෙදීම් එලියෙන් තියලා තමයි සෙක්ස් දොරටුවෙන් ඇතුල්වෙන්න ඕන. ඒ හින්ද සහභාගි වන පාර්ශ්ව එක්ක කතාබහ කරමින් තෘප්ති‍යේ අලුත් ඉසව් සොයායාමයි සෙක්ස් අත්දැකීමක සැබෑ රසය වෙන්නෙ. සම්මත සීමාවන්ගෙන් පිටත අසම්මතය කියන කලාපයේ විවෘතව නිදහස්ව සැරිසැරීමයි හොඳ ලිංගික රසකාමියෙකුගේ රහස වෙන්නෙ.