පිලාවුස් එක ඉස්සරහ වාහනයක කවුරු හෝ දෙන්නෙක් සෙක්ස් කරනවා. ඒ අය දන්නා කෙනෙක් කියල හිතන්න පුළුවන් කෙනෙක් ඒක විනෝදයෙන් වීඩියෝ කරනවා. 31 රෑ ගාලුපාරෙ සිද්ද වුන දෙයක් කියල කතාවක් පැතිරෙනවා. මේ ගැන වෙබ් එකක ප්‍රවෘත්තියක් පළවෙනවා. ඒකෙ හැටියට පොලිසියට මේ ගැන හොඳටම තරහ ගිහින් තියෙනවා. වාහනේ නොම්මර හොයාගෙන පොලිසිය තරාතිරම නොබලා මේ සෙක්ස් කරපු අයට දඩුවම් කරන්න මහන්සි වෙනවා.
මේක මාර රටක්. මහපාර මැද්දෙ පොලුවලින් ගහලා මිනිස්සුන්ව මරලා දානවා. පොලිසිය සංසුන්. ඒත් පාරක සෙක්ස් කරපු ගමන් පොලිසිය නොසංසුන්.
මේක කවුරුන් හෝ විනෝදයෙන් කරන විවෘත සංවාසයක් වග පැහැදිලියි. බලහත්කාරකමක් වගේ තත්වයක් වීඩියෝවෙන් පේන්නෙ හෝ එහෙම පැමිනිල්ලක් ලැබී හෝ නෑ. ඒ වගේම මහපාරෙ වුනත් උන් සෙක්ස් කරන්නෙ උන්ගෙ කාර් එක ඇතුලෙ. ඒ කියන්නෙ පුද්ගලික අවකාශයක.
ඒක මිනිස්සු සතුටු වෙන දෙයක්. කිසි කෙනෙක් අපහසුතාවයට පත් කරන ක්‍රියාවක් නෙමෙයි. උන්ගෙ පාඩුවෙ උන්ට ඒ නිදහස විඳගන්න ඉඩදෙන්න මේ රටේ අධිකාරීන්ට බැරිවෙන්නෙ ඇයි?
ඒ වීඩියෝව වට්ස්ඇප් හරහා හැම තැනම ෂෙයාර් වෙන්න ගන්නවා. වට්ස්ඇප් කියන්නෙ පොදු අවකාශයක් නෙමෙයි. ඒකෙ ඉන්නෙ පුද්ගලික යාලුමිත්‍රයො. එතකොට ඒ අය අතර ෂෙයාර් වෙන ක්ලිප් එකක් අසභ්‍ය වීඩියෝ මුදාහැරීමක් වෙන්නෙ කොහොමද? ඒ කොහොම වුනත් වීඩියෝව ෂෙයාර් කරන වරද සෙක්ස් කරපු උන් පිට පැටවෙන්නෙ කොහොමද?
ඊට පස්සෙ මේකට තව කතාවක් ගැටගැහෙනවා. විමල් කැටපෙආරච්චි තමයි මේ කාර් එකේ ඉන්නෙ කියල. මේ ප්‍රවෘත්තිය වාර්තා කරන වෙබ් එකේ හැටියට ඒක වාහන අංක පරීක්ෂා කිරීමෙන් පස්සෙ හොයාගත්ත තොරතුරක්. විමල් මෙහෙම වැඩක් කළා නම් ඒක මරු. එහෙම විවෘත ලිංගික ආස්වාදයක් ලබන යාලුවෙක් දේශපාලන මිතුරෙක් විදිහට ඌට ගරු කරන්න ඕන.
හැබැයි එහෙම නෙමෙයි නම් ඒක අපහාස කිරීමේ උවමනාවකින් ගොතපු ප්‍රවෘත්තියක්. කවුරුන් හෝ තමන්ගෙ වාහනයක කරපු ලිංගික සංසර්ගයක් දන්නා කියන කෙනෙකු මත අලවා කුණු රසයක් නිර්මාණය කරන්න ගත්ත උත්සාහයක්. සැබෑ අපචාරය තියෙන්නෙ එතන. සෙක්ස් කැත නෑ. සෙක්ස් අපහාස අර්ථයකින් පාවිච්චි කරන එකයි කැත. ඒකයි අසභ්‍ය.
මේ කරුණු නිවැරදි නැත්නම් සැබෑ අසභ්‍ය ප්‍රකාශනය කරමින් ඉන්නෙ මේ වෙබ් අඩවිය. ඇඟිල්ල දික්වෙන්න ඕන එතනට.
