කොලින් විල්සන් 3 වන කොටස
මේ හැම දේකින්ම දැඩි උනන්දුභාවයක් වගේම ඇතිවිය හැකි නොයෙක් බලපෑම් ගැන ප්‍රශ්න මතු කරනවා. ස්ටඩි ඔෆ් මර්ඩර් පොතේ මම යෝජනා කළා පොඩි දරුවන්ගෙ ලිංගික ආශාව නොවැඩුනු එකක් කියල. ඒක හරියටම කෑම ගැන ඇතිවන ආශාව වගේම සරලයි. තමන්ගේ ලිංගික අවයවය උත්තේජනය කිරීමේ උවමනාවක් විතරයි. මේ මුල් වයසෙදි මේ ආශාව යම් කිසි වස්තුවක් එක්ක මෝහනීය ලෙස බැඳුනොත් කෙනෙකුගෙ ලිංගික තෘප්තිය ඒ වස්තුව එක්කම සම්බන්ද වෙනවා. මේක නයිට් කැප් එකක්, ඒප්‍රන් එකක්, හැරමිටියක්, එහෙම නැත්තං ඒ ළමයාගේම ලිංගික කලාපයක් හෝ වෙන ළමයෙකුගෙ ලිංගික කලාපයක් වෙන්න පුළුවන්. වාසනාවට ගොඩක් පිරිමි මේ විදිහට මෝහනය වෙන වස්තුව අයිති වෙන්නෙ විරුද්ධ ලිංගිකයෙකුට.
එක මූලික දෙයක් මෙතනදි කියන්න වෙනවා. ලිංගික ආශාව සරලම අර්ථයෙන් ගත්තොත් ලිංගික ඉන්ද්‍රියෙහි ඉල්ලා සිටීමක් වෙනවා. ඒක හරියට චුම්බකත්වය කියන්නෙ චුම්බකය හා බැඳුනු දෙයක් වගේමයි. වෙනස තියෙන්නෙ ලිංගික ඉන්ද්‍රිය හරියට ඉලෙක්ට්‍රො මැග්නට් එකක් නැත්තං විද්‍යුත් චුම්බකයක් වගේ වෙන එකයි. ඒක එක්කො සම්පූර්ණයෙන්ම නිරුද්ධයි. නැත්තං සම්පූර්ණයෙන්ම ආරෝපිතයි. ඒක ලිංගික ඉන්ද්‍රියේ ඇතිවන ස්ථිති විද්‍යුතයක්. කොයි විදිහෙන් හරි මෝචනය වෙන්නයි අවශ්‍ය. අපි මේ ලිංගික විද්‍යුතය උත්පාදනය කරන ඩයිනමෝව ගැන දන්නෙ බොහොම සුළුවෙන් නමුත් මේ විද්‍යුතය කොහෙත්ම නොසලකා හැරිය හැකි එකක් නෙමෙයි. ලිංගිකත්වයෙදි පරිකල්පනය විසින් ඉටු කරන කොටස ගැන සාකච්ඡා කරද්දි අපි කොහොමවත් නියම ශාරීරික අවයවයේ පැවැත්ම අමතක නොකල යුතුයි. සමහර විට වෙන බොහෝ දුරබැහැර දෙයක් ගැන කල්පනා කරමින් සිටින පිරිමියෙක් එයාගෙ යටිකය යමකට තෙරපුනාම දැනෙන කිතිකැවෙන කරන්ට් එක එයාව පුදුම කරන්න පුළුවන්.
මේ තැනදි අපිට ලිංගික ආශාව ගැන පැහැදිලිව කියන්න පුළුවන් එකම එක පොදු කාරණයක් විතරයි. ඒ මේ ආශාව අනෙක් මානව ආවේගයන්ට වඩා ගැඹුරු තලයක ක්‍රියාත්මක වෙන බවයි. සමහර විට ආත්මාරක්‍ෂාවටත් වඩා. සමස්තයක් විදිහට මිනිසාට පුළුවන් ඔහුගේ රසයන් සහ ආශාවන් තේරුම් ගන්න. ඔහුට උවමනා මුදල්, සමාජ තත්වය, හෝ ප්‍රසිද්ධිය, නැත්තං ඔහුගේ අධිපති ආශාව තියෙන්නෙ චිත්‍ර හෝ පරණ පොත් එකතු කරන්න වුනත් ඔහුට පුළුවන් ඒ ආශාව දිගේ ආපස්සට ගිහින් එහි මූලය හොයාගන්න. එය ඔහුගේ වටිනාකම් ලැයිස්තුවේ ඉස්සරහට ආපු හැටි තේරුම් ගන්න පුළුවන්. සවිඥානක වෙන්න අමාරුම ආවේගය තමයි ලිංගික ආවේගය. කෙනෙකුට හිතන්න පුළුවන් එයාට නම් ඒක තේරුම් ගන්න පුළුවන් කියල. ඒත් එකවරම ඒ ආශාවෙන් ඒ මනුස්සයටම හිතාගන්න බැරි කෙලවරකට එයාව අරන් යන බව නිසැකයි. ෂෝ ගේ මෑන් ඇන්ඩ් සුපර්මෑන් නාට්‍යයෙ තියෙනවා ලෝකෙ වෙනස් කිරීමේ මහා උවමනාවෙන් පෙලෙන කෙනෙක් වුනත්, එයාගෙ ඉතාම නිවැරදි ගනංබැලීම් සියල්ල බිඳහෙලමින්, තමන් යන්තමින් හෝ ගරු කරන ගැහැනියක සමග ලිංගිකව එක්වීම සඳහා පෙළඹෙන්න පුළුවන් කියන එක. එයා ඈන්ව බදාගන්න ගමන් මෙහෙම කියනවා.
“ජීවිතානුරාගය විසින් මාව අමන්දානන්දයට පත් කරනවා. ඔයා මගේ අත්දෙක මැද්දෙ ඉන්න කොට මට මුලු ලෝකෙම තියෙනවා වගෙයි. ඒ ජීවිතය ගැව අනුරාගය විසින් මාව සම්පූර්ණයෙන්ම නතු කරගෙන ඉවරයි”.
රොමේන් රෝලන්ඩ් එයාගෙ ජින් ක්‍රිස්ටොෆර් කතාවෙත් මේ දේම කියනවා. එයා ක්‍රිස්ටොෆර්ගෙ අම්මයි තාත්තයි අතර කිසිදු සමානකමක් හෝ සම නැඹුරුවක් නෑ කියල කියද්දි එයා කියනවා, “තාත්තාට කිසිම අදහසක් තිබුනෙ නෑ මොන එකක් හින්දද එයා ඒ තරම් හොඳ රස්සාවක් අතෑරලා මේ වැඩකාර කෙල්ලෙක් බඳින්න යන්නෙ කියල. ඒත් ඔහුව මේ කුඩා තඹ කෙස් ඇති වැඩකාර කෙල්ල ළඟට ඇදලා දාපු නොදන්නා බලවේගයට ඒක අදාලම නෑ. එයා එයාගෙ කොටස කළා”
