පහන්තුඩාවේ වීඩියෝවක් නිසා පොලිසිය විසින් දැනට පරීක්ෂණ පවත්වමින් සිටින යුවළ වෙනුවෙන් අවශ්‍ය නීතිමය සහාය ලබාදීමට ඕනෑම විටක සූදානමින් සිටින බව ලංකාවේ සුප්‍රකට නීතිවේදීන් කණ්ඩායමක් පවසනවා. ඒ සඳහා අවශ්‍ය වුවහොත් අප හරහා ඔවුන් සම්බන්ධ කරගැනීමට හැකියි. ([email protected])
ඔවුන්ට නඩු පැවරිය හැකි වන්නේ අසභ්‍ය ප්‍රකාශන පණත සහ ප්‍රසිද්ධ ස්ථානවල අශෝබන ලෙස හැසිරීම කියන පාදඩ ආඥා පණත යටතේයි. මෙහිදී මේ අයගේ නීතිමය සහ සමාජමය අයිතීන් ආරක්ෂා කිරීම වෙනුවෙන් පෙනී සිටීම වැදගත් බවයි මේ නීතිඥවරු සඳහන් කරන්නෙ.
මේ සම්බන්ධයෙන් රජයකට සාධාරණ ගැටලුවක් ඇතිවිය හැකියි. මෙය ප්‍රවණතාවයක් වශයෙන් කෙරෙන්න ගත්තොත් ඉන් සමාජමය කම්පනයක් ඇතිවිය හැකියි. මේ නිසා මෙවන් සිදුවීමකදි පළමු වරට පොදුවේ සමාජයට දැඩි දැනුවත් කිරීමක් සිදුකිරීමේ අවශ්‍යතාවය පවතිනවා. නමුත් මේ ආකාරයට දෙදෙනෙකු හඹා ගොස් ඔවුන්ගේ අනාගත ජීවිතවලට පවා හානිදායක විය හැකි අන්දමින් කටයුතු කිරීම මානුෂික නොවේ යන්න ඔවුන්ගේ අදහසයි.
එසේම මෙවන් අවස්ථාවක සදාචාර පොලිසිය විසින් මේ පුද්ගලයන්ගේ මූලික අයිතිවාසිකම් කඩවිය හැකි බවත්, වි‍ශේෂයෙන්ම මේ අය සැකකරුවන් වෙන තත්වයකදී ඔවුන්ගේ ඡායාරූප සහ විස්තර මාධ්‍යවලට ලබා දුනහොත් ඒ නිලධාරීන් වෙනුවෙන් දැඩිව ක්‍රියාත්මක වීම අවශ්‍ය බවද එම නීතිවේදීන් පෙන්වා දෙනවා.
මේ වීඩියෝව ප්‍රසිද්ධ ස්ථානයක රූගත කෙරුනක් ලෙස හැඳින්වුවද එය රූගත කර තිබෙන්නේ අවට කිසි කෙනෙක් නොගැවසෙන වෙලාවක බව පැහැදිලිය. එමෙන්ම එය මුදා හැර තිබෙන්නේද පෝර්න්හබ් නම් වැඩිහිටි වීඩියෝ ජාලයකටයි. මේ නිසා කෙනෙක් මේ වීඩියෝව දකින්නේ තමන් විසින් අදලා වෙබ් අඩවිය සොයාගොස්, තමන්ගේ වයස අවුරුදු 18ට වැඩි බව තහවුරු කිරීමෙන් පසුවයි. මේ නිසා මෙයින් මහජනතාවට හානියක් වෙනවා යන අදහස පිළිගත නොහැකියි.
මීට පෙර ලංකාවේ හිටපු අගවිනිසුරුවරයෙක් පාර්ලිමේන්තු පාරේ කලිසමද රහිතව රමණය කරමින් සිටියදී පොලිසියට හසුවූ අවස්ථා තිබේ. පහන්තුඩාවට වඩා එය ප්‍රසිද්ධ ස්ථානයකි. ඒ සම්බන්ධයෙන් අශෝබන ලෙස හැසිරීමේ නීතිය ක්‍රියාත්මක වුනේ නැත. සමාජයේ පොඩි මිනිසුන්ට පමණක් ක්‍රියාත්මක වන සදාචාර නීතියක්ද රටේ පවතින්නෙ කියන ගැටලුව මෙතනදි පැණ නගිනවා.
මෙයින් ඇතිවන සමාජ කම්පනයට මූලික හේතුව ප්‍රධාන ධාරාවේ මාධ්‍ය මගින් වගකීමකින් තොරව මීට ලබා දුන් අනවශ්‍ය ප්‍රසිද්ධියයි. ඊට මේ අදාල යුවල වගකිව යුතු වන්නේ නෑ. රජයේ දැනුවත් කිරීමක් වඩාත් අවශ්‍ය වන්නේ මේ පිළිබඳව මාධ්‍ය වගකීමද අවධාරණය කළ යුතු නිසාවෙනි.
එමෙන්ම මෙවන් සිද්ධීන් සම්බන්ධයෙන් පොලිසිය ක්‍රියාත්මක වීමේ ඉතාම නරක අත්දැකීම් අප සතු බව සේයා දැරිය සම්බන්ධ සිද්ධිය මතක් කරමින් මේ නීතිඥ කණ්ඩායම විසින් පෙන්වා දෙන ලදී.
