Ti West ගෙ අලුත් ෆිල්ම් එක X. හොරර් ත්‍රිලර් සහ සොෆ්ට් පෝර්න් කැටගරිවලට කැමති කෙනෙක් නම් අනිවාර්යෙන්ම බලන්න ඕන එකක්. පෝර්න් ෆිල්ම් එකක ඇතුලෙ හොරර් ෆිල්ම් එකක් හම්බුවෙනවා වගේ වැඩක්. Ti West කියන්නෙ හොරර් ජොන්රා එකේ ඉන්ටලෙක්චුවල් කෙනෙක්. ඉතින් මේ ෆිල්ම් එක හරහා එයා හොලිවුඩ් සිනමාවෙ එක්තරා ඉතිහාස පරිච්ඡේදයක් ස්පර්ශ කරනවා.
එයාගෙ සිනමා කලාවට කියනවා lowbrow cinema කියල. ඒ කියන්නෙ බොරු කැටයම්, කලා සංකීර්ණ නැති ඕනම කෙනෙකුට වැටහෙන සරල වින්දනාත්මක සිනමාවක්. ඒ සරල බව ඇතුලෙ එයා දෙන ගේම් එකයි පුදුම හිතෙන්නෙ. house of devil, Sacrament වගේ Ti Westගෙ කලින් ෆිල්ම් බලලා තියෙන කෙනෙකුට මේක තේරෙනවා.
කතාව දිගහැරෙන්නෙ 1979. ඒ කියන්නෙ හෝම් වීඩියෝ මාර්කට් එක නැගලා එන දවස්. තරුණ සෙට් එකක් යනවා මේ මාර්කට් එකට ඇඩල්ට් ෆිල්ම් එකක් කරන්න. ගම් පලාතක පාලු ලොකු ගොවිපොලකට. ඒක ඇතුලෙ ෆාමර්ස් ඩෝර්ටර්ස් නැත්නම් ගොවියාගේ දියණියෝ නමින් වැඩිහිටි චිත්‍රපටියක් හදන එක තමයි බලාපොරොත්තුව. මේකෙ ෆිල්ම් එකේ ප්‍රොඩියුසර්ට මාර්කට් එක පිනා යන සෙක්ස් ෆිල්ම් එකක් ඕන වුනාට ඩිරෙක්ටර්ට ඕන වෙන්නෙ ආර්ට් ෆිල්ම් එකක්. ඩිරෙක්ටර්ගෙ පෙම්වතිය ඉන්නෙ ලොකු අවුලක. ආර්ට් ෆිල්ම් එකක් කියල බාල සෙක්ස් ෆිල්ම් එකක් ගහන තමන්ගෙ පෙම්වතා එක්ක තරහක.
එක තැනකදි මේ සදාචාර ප්‍රශ්නයක පෙලෙන පෙම්වතිය තීරණය කරනවා එයත් මේ ෆිල්ම් එකේ පෙනී ඉන්නවා කියල. මෙච්චර වෙලා මේක ආර්ට් ෆිල්ම් එකක් වශයෙන් තර්ක කරපු ඩිරෙක්ටර් කරකැවිලා යන්නෙ එතකොට.
‘එහෙම මැද්දෙදි ප්‍රධාන චරිත අලුතෙන් එකතු වෙන්න බෑ’ කෙල්ලව වලක්වන්න ඩිරෙක්ටර් කියනවා.
‘එහෙනං සයිකො ෆිල්ම් එකේ තියෙන්නෙ’ කෙල්ල කියනවා.
‘ඒක හොරර් එකක්. මේක පෝර්න් එකක්’
Ti West කරන්නෙ හොරර් පෝර්න් එකක්.
මේ විදිහට චිත්‍රපටිය පුරාම ඒ අතීත සිනමා සළකුනුවල මතක තැවරිලා තියෙනවා. ටෙක්සාස් චේන් සෝ මැසකර් වගේම ඩීප්ත්‍රෝට් එකේ ලින්ඩා ලව්ලේස් පවා මතක් වෙනවා.
මීට අමතරව මේ ගොවිපොල අයිති ගැහැණියගේ ජීවිතයේ ආශා තෘප්තිමත් නොවීමේ ඛේදවාචකයකුත් මේක ඇතුලෙ තියෙනවා. හරියට අපේ කිරිබත්ගොඩ ඥානානන්දගේ පන්සල පන්නයේ කාමවිරෝධී ක්‍රිස්තියානි නිකායක බැතිමත්තු වෙන මේ ඇමරිකානු ගැමියො දැඩි ලෙස සිරගත වූ ආශාවලින් පෙලෙනවා. ඒ ආශාවන් එලිපිට සංතර්පනය කරන අය ගැන වෛරයෙන් පෙලෙනවා. ඒ අය සාතන්ගේ බලපෑමට හසුවූ අය නිසා ඔවුන් මරාදමා ලෝකය යහපත් කළ යුතුයි කියල හිතනවා. මේ ෆිල්ම් එක යට තියෙන දේශපාලන ආඛ්‍යානය වෙන්නෙ ඒක.
අවසානයේදි අපි දැනගන්නවා මේ පියුරිටන් නිකායේ ප්‍රධාන දේශකයාගේ දියණිය තමයි අපිට පෝර්න් නිළියක් විදිහට මුනගැහෙන්න කියන එක. ඒ දේශනවල වචන පවා කටපාඩම් ඇය ජීවිතය හොයාගෙන ඉන්නෙ ඊට සම්පූර්ණ ප්‍රතිවිරුද්ධ ආශාවන්ගෙන් මත්වීම ඇතුලෙ. කාමසුඛල්ලිකානු ලෝකය ඇතුලෙ.
ඒ පැරණි ආගමික- සෙක්ස් විරෝධීන් මෙන්ම සෙක්ස්වල ආර්ට් හොයන, සෙක්ස්වල සල්ලි හොයන සියල්ලනුත් කපා කපා කෑලි කපා මැරී යනවා. ඉතිරි වෙන්නෙ ඒ ලෝක දෙකේම පැල්ම තුලින් එලියට එන අපේ නවක පෝර්න් නිළිය පමණයි. එයා තමයි කතාවෙ වීරවරිය.
