ජේසුස් වහන්සේගේ දියණිය නැත්නම් රුධිර ධාතුව ගැන විස්තරය ජනප්රිය කතිකාවට ආවෙ ඩෑන් බ්රවුන්ගෙ ඩාවින්සි කෝර්ඩ් පොතට පස්සෙ. ඒ පොතට පාදක වුනේ පල්ලියෙන් පිලිගත් බයිබලය විසින් බැහැර කරන ලද අනෙකුත් සාන්තුවරුන්ගේ සටහන් සහ මේ වන තෙක් නොනැසී පවතින ජනප්රවාදයන්.
අපි අද බයිබලය කියලා එක ග්රන්ථයක් බාරගත්තට ඒ ග්රන්ථය නිර්මා ණය වෙන්නෙ බලය හිමි ආගමික අධිකාරීන් විසින් තවත් බොහෝ ලේඛන බැහැර කිරීමෙනුයි. ඒවාට අපි කියනවා ‘ගොස්පෙල්’ නොහොත් දේවවාක්ය කියල. ජේසුන් සමීපයේ සිටි එක් එක් අනුගාමිකයන් විසින් තමන්ට උන්වහන්සේ දේශනා කළ දේ ගැන ලියවුනු ලේඛන තියෙනවා (ඒවා ඔවුන්ගේ මගපෙන්වීම ලත් ප්රජාවන් අතින් ලියවුනු ඒවා). ඒ අනුව හතලිහකට පනහකට ආසන්න ප්රමාණයක් ලේඛන අපිට මුල් ක්රිස්තියානි යුගයෙදි ඒ කියන්නෙ, ක්රි.ව 30- 350 වගේ කාලෙදි මුනගැහෙනවා. සිරියාවෙ එක දහමක්, ඊජිප්තුවෙ තවත් දහමක්, රෝමයේ වෙනත් එකක්, ග්නොස්ටික් දහම ලෙස තවත් ප්රවාහයක් වගේම කාන්තාවන් විසින් පිලිගත් තවත් ක්රිස්තියානි දහමක් ආකාරයෙන් මේ විශ්වාස පද්ධතීන් විවිධයි. අපි අද පිලිගන්න තනි බයිබලය නිර්මානය වෙන්නෙ කොන්ස්ටන්ටයින් රෝම අධිරාජයා යටතේ ක්රිස්තියානිය රාජ්ය ආගම බවට ස්ථාපිත වීමෙන් පස්සෙයි. මෙතනදි අනෙක් සාන්තුවරුන් සහ වරියන්ගේ සටහන් භයානක, පිටමංකළ යුතු ඒවා වශයෙන් බැහැර කරනවා.
මෙතනදි ’ගොස්පෙල් ඔෆ් මේරි’ ‘ගොස්පෙල් ඔෆ් පිලිප්, තෝමස්, ජුදාස් ආදී බොහොමයකගේ ලේඛන ඉවත් වෙනවා. මැතිව්, මාක්, ලූක්, ජෝන් යන හතර දෙනාගෙ පොත්වලින් පමණක් නූතන බයිබලය නිර්මාණය වෙනවා.
කෙනෙකුට ජේසුස් වහන්සේගේ දර්ශනය එහි මුල් පුළුල් අර්ථයෙන් තේරුම් ගන්න නම් අර පැරණි ලේඛන කියවන්න සිද්ද වෙනවා. මෙතනදි විශේෂම ලේඛනයක් තමයි මේරි මගද්ලේනාගේ කතාව ලෙස ලියා තබන ලද සලකන ‘ගොස්පෙල් ඔෆ් මේරි’ කියන පොත. මේ පොත ඇතැම් කොටස් විනාශ වී නමුත් පසුව සොයාගෙන තියෙනවා. එහි අඩංගු ජේසුන් විසින් දේශනා කරන ලදැයි කියන දහම අද කතෝලික පල්ලිය විසින් දේශනා කරන දහමට වඩා බෙහෙවින් වෙනස් එකක්. ඒ වගේම මේරි සමග ජේසුන්ගෙ තිබුනු සමීප සම්බන්ධතාවය ඇතුලෙ ඇයට පවසන ලද බොහෝ දේ එහි තියෙනවා. විශේෂයෙන්ම පුරුෂමය ක්රිස්තියානිය ස්ත්රීමය ආධ්යාත්මික කියවීමකට හැරෙන දොරටුව මේරි මග්දලේනාගේ පොතේ සටහන් වෙනවා.
මේරි මග්දලේනා කියන්නෙ ජේසුස් වහන්සේ විසින් ගලවාගත් ගණිකාවක් කියන එකයි අපි අහලා තියෙන කතාව. ඇය විසින් කළ පාපයන් සමා කරනු වස් ඇය ජේසුන් පසුපස පැමිණි අනුගාමිකයෙක් විදිහටයි පල්ලිය ඇයව නිරූපණය කරලා තියෙන්නෙ. නමුත් මේක සම්පූර්ණ අසත්ය කතාවක්. ඇය ගණිකාවක් වශයෙන් සඳහන් කිසිදු තැනක් පිලිගත් බයිබලයේ හෝ බැහැර කළ කොටස්වල අඩංගු නෑ.
මේක කරන්නෙ පෝප් ග්රෙගරි විසින් ක්රි.ව 591දි පමණ කියලයි කියන්නෙ. මේ පෝප්වරයා විසින් කාන්තාවන් තුන්දෙනෙකුගේ කතා එකතු කරලා මේරි මග්දලේනා ගණිකාවක් වශයෙන් නිර්මාණය කරනවා. ලාසරස්ගේ සොයුරිය වූ බෙතනිහි මේරි, ජේසුන්ගේ පා දෝවනය කළ නමක් නැති පව්කාර ස්ත්රියක් සහ මේරි මග්දලේනා කියන චරිතය එකට මුහු කරනවා. ඒක අයිඩියොලොජිකල් ගේම් එකක්.
ඇත්ත මරියා මග්දලේනා අපිට මුනගැහෙන්නෙ ධනවත් කාන්තාවක් විදිහට. ඇය ජේසුස් වහන්සේගේ අනුග්රාහිකාවක්. දේශන පවත්වමින් යද්දි විවිධ පහසුකම් සලසන කාන්තාවක්. එයාට මුදල්, දේපොල වගේම ආර්ථිකව ස්වාධීනත්වයක් පැවැතුනු වග පේනවා. මෙන්න මේ වගේ කාන්තාවක් ඒ කාලයට සාපේක්ෂව ආගමික අධිකාරියට පිලිගන්න පුළුවන්කමක් නෑ. ජේසුස් වහන්සේ යන එන තැන්වල සැරිසැරූ, නිදහස් කාන්තාවක් කියන එක පෝප් ග්රෙගරිට පිලිගන්න පුළුවන් වෙන්නෙ ගණිකාවක් විදිහට විතරයි. මොකද නැත්නම් ඒ කාලෙ හැම කාන්තාවක්ම පියාට, සැමියාට හෝ සහෝදරවරුන්ට යටත්ව පවුලේ දේපොලක් හැටියට පවතින්න ඕන. මග්දලේනා වෙනස්. ඒක ශාන්ත පීතරව ප්රධානියා කොට ගොඩනගන පිරිමි ක්රිස්තියානි කතිකාවට ලොකු අභියෝගයක්. මේ නිසා මේරිව අපහාසාත්මකව පිටුවහල් කිරීමක් තමයි සිද්ද වෙන්නෙ.
බැහැර කරන ලද ලේඛන අනුව අපිට කියවගන්න පුළුවන් වෙනවා මේරි කියන්නෙ ජේසුස් වහන්සේගෙ 13වෙනි අනුගාමිකයා බව. ඒ වගේම ඇතැම් විට ප්රධානම අනුගාමිකයා වෙන්න පුළුවන්. ඇයව මේ කතාවෙන් පිටමං කිරීමේ උවමනාව කොයිතරම්ද කියනවා නම් 13 නපුරු අංකයක් විදිහට පවා පිලිගැනීමක් නිර්මාණය වෙනවා.
ශාන්ත පිලිප්ගේ කතාව ඇතුලෙ අපිට මග්දලේනාව මෙහෙම මුනගැහෙනවා.
‘ඇය උන්වහන්සේගේ සහකාරිය වුවාය. උන්වහන්සේ අන් සියලු අනුගාමිකයන්ට වඩා ඇයට ප්රේමනීය වූහ. උන්වහන්සේ නිතර මුවට මුව තබා ඇයව සිපගත්හ. මෙය අනෙක් අනුගාමිකයන්ගේ අකමැත්තට, පිටුදැක්මට හේතු වූයේය.
ඔබවහන්සේ අප සියල්ලන්ට වඩා මග්දලේනාට ප්රේම කරන්නේ මන්දැයි ඔවුන් විමසා සිටියේය.
මම ඇයට සමානවම ඔබට ප්රේම නොකරන්නේ මන්ද? දෑස නොපෙනෙන්නෙක් සහ දෑස හොදින් පෙනෙන්නෙක් එකම අන්ධකාර කුටියක සිටී නම් ඔවුන් එකිනෙකාගේ වෙනස්කමක් නැත්තේය. නමුත් ආලෝකය පැමිනි කල දෑස පෙනෙන්නා ආලෝකය දකින්නේය. දෑස නොපෙනෙන්නා අන්ධකාරයේම සිටින්නේය උන්වහන්සේ කීහ.’
-ශාන්ත පිලිප්-
මග්දලේනාව ආධ්යාත්මික අවබෝධයක් ඇත්තියක් හැටියට බාරගන්න මුල් අනුගාමික කණ්ඩායම අතරත් අවුලක් තිබුනු බව පැහැදිලියි. පීතරට කණ්ඩායමේ නායකත්වය දැරීමට තිබුනු උවමනාවත් එක්ක මග්දලේනා ජේසුන් සමග වඩාත් සමීප වීම ඉතා නුරුස්සනසුලු එකක් වුනා. ඒ කාලෙ කොහොමවත් පිරිමියෙකුට කාන්තාවක් අධ්යාත්මික අවබෝධයට පත්වීම කියන එක බාරගත හැකි මනසක් තිබුනෙ නෑ. ජේසුස් මෙතනදි සුවිශේෂ වෙන්නෙත් ඒකමයි.
මරියා මග්දලේනා සමග ජේසුන්ගේ කායිකමය ඇසුරක් පැවතුනා කියන එක නූතන ක්රිස්තියානියට කොහොමවත් බාරගන්න බැරි ප්රවාදයක්. ඒ මෙම නුතන ආධ්යාත්මික කතිකාව විසින් කායික ආස්වාදය පාපයක් විදිහට බැහැර කරන හින්ද. නමුත් ඒ කාලෙ ආධ්යාත්මික ඉන්ටිමසිය සහ කායික ඉන්ටිමසිය කියන දෙක ප්රතිපක්ෂයන් වුනේ නෑ. සෙක්ස් කියන්නෙ ශුද්ධ වූ එක්වීමක්.
ජේසුස් මරණයෙන් පසු යළි උත්ථානය වීමේ එකම සාක්ෂිකාරිය වෙන්නෙ මග්දලේනා. ඔහුගේ මරණයේ අවසාන මොහොත දක්වාම ළග ඉන්නෙ ඇය විතරයි. ඒ තරමට ඇය සමීපයි. නැවත පිරිස අතරට ඇවිත් මග්දලේනා ඇය දුටු දර්ශනය කියනවා. එය ඇසීමෙන් පීතර් තැති ගන්නවා.
‘උන්වහන්සේ කවදාවත් මෙහෙම කියන්නෙ නෑ’ කියල ඇයව බැහැර කරනවා.
ජේසුස් වහන්සේ මරණයෙන් පසු යළි උත්ථානය වී ඇයව ආමන්ත්රණය කරනවා
‘මේරි..’
‘ගුරුතුමනි’ ඇය නැගීසිටිනවා.
‘මා මත වැළපෙමින් සිටින්න එපා. මගේ සහෝදරයන් වෙත යන්න. මා මරණයෙන් නැගී සිටි වග ඔවුන්ට පවසන්න’
මේ කතාව පීතරට කිව්වම ‘ඇයි එතුමන්ට බැරි වුනේ අපි හැමෝටම කියන්න? ඇයි එතුමන් ඔබට පමණක් ආමන්ත්රණය කරන්නෙ?’ යැයි ඇයව ප්රතික්ෂේප කරනවා.
මරියා මග්දලේනාට අනුව ජේසුන් විසින් දේශනා කරන දහම ඉතාම ගැඹුරු රැඩිකල් දහමක්. මරණයෙන් පසු ශරීරය එය තැනී ඇති මූලික සංඝටකවලට බිඳි යන අතර ආත්මය එයින් නිදහස්වන බව ඇය කියනවා. දේව රාජ්යය පවතින්නේ බාහිරයේ නොව තමන් තුලම බව කියනවා. සම්පූර්ණ දහම අභ්යන්තරයට නැඹුරු කරන අතර සියලු ආයතනගතවීම් ප්රතික්ෂේප කරනවා.
මේරි කියන්නෙ ජේසුස්ගෙ ස්ත්රීමය ප්රඥාව. ඇය තමයි ගර්භාෂය. ඔහු දේශනා කරන දේ ඇය දරාගනිමින්, අවබෝධ කරගනිමින්, නැවත සන්නිවේදනය කරනවා. ජේසුන්ව පූර්ණත්වයට පත්වෙන්නෙ මග්දලේනා නිසයි.
ජේසුස් වහන්සේගේ මරණයෙන් ඉක්බිති ඇය මධ්යධරනී මුහුද හරහා ප්රංශයේ දකුණු පළාතට ගිය බව කියවෙනවා. එහි සිටිමින් තමන් ඇසූ දහම දේශනා කරමින් ඇය ජීවත් වුනු බව සඳහන්. මේ නිසා මේරි මග්දලේනා ඒ ප්රජාව අතර සාන්තුවරියක්. ඔවුන් ඇය බෝට්ටුවෙන් පැමිණි කතාව තවමත් පූජනීය විදිහට සමරනවා.
ඇයට ජේසුස් වහන්සේට දාව දියණියක් සිටි බව කියනවා. ඇගේ නම තමයි සාරා. ජේසුස්ගේ ලේ ධාතුව දරාගත් ඇයවත් සාන්තුවරියක් විදිහට නමස්කාර කරනවා.
මේරි මග්දලේනාගේ දහම පල්ලියේ දහමට වඩා බෙහෙවින් වෙනස්. එහි හයරාකියක් නැහැ. නායකයන් හෝ පූජකයන් නැහැ. අභ්යන්තරයෙන් දැනීම සහ ආදරය පමණයි. මේ සියල්ලටම එපිටින් ඇය ගැහැණියක්. ඉතින් ආගමික සංස්ථාවක් ඇයව කොහොම බාරගන්නද?
