කාමකතා චක්‍රවර්තී රෝලන්ඩ් කේ පෙරේරා ලියන නවකතාව
පළමු කොටස
එදින කාර්ය බහුල දවසකි. අමන්දා හිටියේ පිස්සුවෙන් වගේය. හුවමාරු වෙන කෝල් අතරෙ ඇගේ සිහියද විකල් විය. ඒත් ජීවිතයේ හැටි එහෙමය. පඩියට වැඩ කරනවා නම් මහන්සි විය යුතුමය. නිකං පඩි දෙන්න කවුරුවත් අමන්දාට නැත.
ආ.. මොකද මූන රතුවෙන්න වැඩ හම්බුවෙලා නේද?
පිටිපස්සෙන් යන ගමන් අරලියා අමන්දාගේ පස්ස කෙනිත්තුවාය.
ඌයි..
අනිත් පැත්තේ ක්ලයන්ට් ගැන නොහිතා අමන්දාට කෑ ගැස්සුනි. අමන්දා හිටියේ මේසයට හේත්තු වී ඉදිරියට නැමීගෙනය. අරලියා හැමතිස්සෙම එහෙමය. අමන්දාගේ පස්ස දුටු තැන අඩන්තේට්ටම් කරයි. අමන්දාට තිබුනෙත් එහෙම මොනවාම හරි කරන්න හිතෙන පස්සකි. කෙනිත්තූ වෙලාවට කේන්තියෙන් ගහන්න පැන්නත් පස්සෙ හැඩයට ලැබුනු ප්‍රශංසාව අමන්දාට මොහොතකින් සතුටක් ගෙනෙයි.
කොන්ෆරන්ස් කෝල් කියන්නෙ ඔහේ කාලය කාදමමින් අහගෙන ඉන්න එකටය. වැදගත් කාරණයක් කවුරුන් හෝ කියතොත් ඒ ඉතාම අහම්බයකි. කොහොමත් කතා කරන සියල්ල පටිගත වෙයි. එබැවින් කතා කරන කෙනෙකුට කියවාගෙන යන්න ඉඩදෙනවා මිස කළ යුතු වෙන මොකුත් නැත. කනේ ෆෝන් එක තිබුනට කන ඕෆ් කර තබා ගත හැක. එය කාලයක් තිස්සෙ දුරකතන පනිවුඩවලින් හිරිහැරයට පත්වෙන කන් විසින් සොයාගන්නා තාක්‍ෂණයකි.
අමන්දා කෝල් එක අහන් ඉන්න අතරෙ ෆේස්බුක් එක එබුවාය. මැසෙන්ජර් පනිවුඩයක් ඇවිත් එල්ලී තිබුනේය. එය එවා ඇත්තේ ජෝසප් ස්ටාලින්ය.
ඇමන්ඩා මයි ඒන්ජල්. ලෙට් මී බී යුර් සෙක්ස් ස්ලේව් ෆොර් මයි එන්ටයර් ලයිෆ්. ලෙට් මී වර්ෂිප් යූ.
(අමන්දා මගේ දෙවඟන. මගේ ජීවිත කාලය පුරාවටම ඔබේ ලිංගික වහලා වීමට මට ඉඩදෙන්න . ඔබව නමස්කාර කිරීමට අවසර දෙන්න)
පණිවුඩය එපමණය. හාට් සහ හාදු පෝලිමක්ය. කෝල් එක අතර පනිවුඩය බැලූ අමන්දාට ඉක්කා වැටුනි. ඈට නිතැතින්ම වටපිට බැලුනේ එය කාගේ හෝ නොමනා විහිලුවක් වීමට ඕනෑතරම් ඉඩ ඇති නිසාවෙන්ය.
ඒත් හැමෝම තමන්ගේ පාඩුවේ වැඩය.
හෙලෝ.. කැන් අයි කෝල් යූ ඉන් අ මිනිට්..
(හලෝ, මම ඔබට තව ටිකකින් කතාකරන්නද)
එක්වරම නැගුනු මැඩගත නොහැකි කෝපය නිසා අමන්දාට ක්ලයන්ට්ව විසන්ධි කරන්නට සිදුවිය. මොනවා හෝ කියවෙන්න ඉඩ ඇත. සියල්ලට පෙර තමන්ගේ කේන්තිය පිටකර හැරිය යුතුය. ඒකට මේ වහලාව ඉවරයක් කළ යුතුය.
ජෝසප් ස්ටාලින්? ගුරු සටනෙ ඉස්සරහ හිටපු කෙනා නෙමෙයි. අවුරුදු හතලිහක විතර පෙනුමක් තියෙන මූන උල් හාදයෙක්. කොහොමටත් ගුටිකන මූනක් ඔහුට තිබුනෙ. බැඳලා ළමයිනුත් ඉන්න මිනිහෙක්. අහලා පුරුදු නමක් මිසක් කොහේවත් දැකලා පුරුදු කෙනෙක් නෙමෙයි. අමන්දාට ඔහු දුටුවනම ආවෙ පිළිකුලකි.
ඒ පණිවුඩය තමන්ට අපහාසයක් හැටියෙන් අමන්දාට දැනුනේ ඇයි කියා අප දන්නේ නැතිය. අමන්දා ඒ ගැන දැනසිටියේද නැතිය. නමුත් කවුරුන් හෝ තමන් අපහරණය කරනවා වගේ හැඟීමක් අමන්දාට දැනුනේය.
හිටපං මං ඉස්ටාලින්ට..
අමන්දා අනිත් සියලු වැඩ පැත්තකින් තබාලා ස්ටාලින්ගේ ෆේස්බුක් පිටුවේ ස්ක්‍රීන් ෂොට් ගහන්න වුනාය. දත්මිටි කමින් ඒ ගැසූ සියල්ල එකතු කර පෝස්ට් එකක් ලියන්න ගත්තාය.
”මේ ස්ටාලින් කියන පිරිමියා මගේ සෙක්ස් ස්ලේව් වෙන්න අහනවා. ලැජ්ජාවක් නැති මිනිහෙක්. මං මේ ඔක්කොම එතුමාගේ බිරිඳටත් යවනවා. වැඩ කරන තැන්වලටත් යවනවා. වහලෙක් වෙලා තමයි ඊට පස්සෙ කොහොමත් ඉන්න වෙන්නෙ.”
ඇය ඇඬෙන හිනා පෝලිමක්ද අගට එකතු කළාය. ස්ටාලින් වැඩකරන්නෙ බැංකුවකය. පුළුවන් හැමතැනම ස්ටාලින්ගේ රෙදි ගැලවීම අමන්දාගෙ ඒ මොහොතේ ඒකායන පරමාර්ථය වුනේය. පෝස්ට් බොත්තම ඔබන්න ඔන්න මෙන්න තියෙද්දි අරලියා එතනට කඩාපාත් වුනාය.
මොනවද උඹ ඔය කරන්නෙ?
මං මේ බෙල්ල කඩාගෙන වැඩකරනවා. මේ යකා බලපං.. ඌ මගේ සෙක්ස් ස්ලේව් වෙන්න අහනවා..
ඉතිං ඇයි ඔච්චර තරහ ගිහින්. මිනිහා මොනවා හරි නරක දෙයක් කියල තියෙනවද?
නරක දෙයක්? ඇයි මේක හොඳ දෙයක්ද?
අරලියාට තමන්ගේ කේන්තිය නොතේරීම නිසාම ඇතිවුනු තරහට අමන්දාගෙ අතින් පෝස්ට් බොත්තම තද විය.
ඕක ඩිලීට් කරන්න.. ඌ පව්..
අරලියා ඉල්ලා සිටියත් අමන්දා සිටියේ කාලි ආවේශ වීය. තමන්ගේ පුද්ගලික මැසේජ් කලාපයට ඇවිත් තමන්ට ලිංගික යෝජනා කිරීම නිසාම ඇගේ සංස්කෘතිය සදාචාරය කෝප වී සන්නිපාත වී තිබුනේය. ඒ වෙලාවට කතා කිරීමෙන් පලක් නැත. අරලියා පැත්තකට විය.
ඌ වැරැද්දක් කරලා නෑ. උඹයි වැරදි..
යන්න කලින් අරලියා ඒ ටික අමන්දාට කිව්වාය. අමන්දාට යක්ෂාවේශ වීමට උවමනා වී තිබුනේ ඒ කෙනිත්තිල්ල විතරය.
ඔයා මේ වගේ වල්කම් ටොලරේට් කළාට මං එහෙම නෑ අරලියා. අයි ඇම් අ මැරීඩ් වුමන්. අයි හැව් අ හස්බන්ඩ් ඇන්ඩ් අ සන්. සම් පීපල් හැව් සම්තින්ග් කෝල්ඩ් ඩිග්නිටි ඉවන් දෝ මැනි ඩෝන්ට් හැව් ඉට්..
(මම කසාද බැඳපු ගැහැණියක්. මට සැමියෙක් ඉන්නවා. පුතෙක් ඉන්නවා. සමහර අයට තිබෙනවා ගරුත්වය කියා දෙයක් . බොහෝ දෙනෙකුට නැතුවාට)
ස්ටාලින් ගැන කෝපය අමන්දා අරලියාට දමා ගැසුවාය. අරලියා මොහොතින් එතනින් වාෂ්ප විය. පස්සෙන් පන්න පන්නා බනින්න අමන්දාට ඕනෑ වුනු නමුත් ඈ ඒ මැඩ ගත්තාය. අරලියා අතහැර නැවත ස්ටාලින් වෙත හැරුනාය.
කමෙන්ට් වරුසාවක් වැස තිබුනි. බුකි වාසීන් ස්ටාලින්ගේ ඇඳිවත උනා ඉන් සරුංගල් අරමින් සිටින්නේය. ඔහුගේ බිරිඳගේ සහ දරුවන්ගේ පිංතූරද එලියට ඇදී ඇවිත්ය.
මෙච්චර ලස්සන ගෑනියෙක් මොකට බැන්දද මන්දා අර වගේ අසහනකාරයෙක්…
අමන්දාට ස්ටාලින්ගේ බිරිඳ ගැන අවංකව දුක හිතුනි. තමන්ගේ සැමියා ගැන හීන් ආඩම්බරයක්ද දැනුනි.
මොනවා නැතත් මෙහෙම වල් නැති එකම මදිද..
මොනවා නැතත් කියා ඇයට සිතුනේ මොනවා ගැනදැයි ඇය දැන සිටියේ නැතිය. ඇය දැන නොසිටි මොනවා හෝ ඇයට නැතිවී ඇද්දැයි සොයාගන්නටද බැරිය. බුකියට කාන්තා අපචාරයක යෙදුනු එක පිරිමියෙක් හසුවී ඇත්තේය. එබැවින් මොහොතකින්, කමෙන්ටුවක් හෝ ෂෙයාර් එකක ප්‍රමාදයෙන් අන් සියල්ලන්ට සුදනන් විය හැක්කේය. අමන්දා බලා සිටියේ ස්ටාලින්ගේ ප්‍රතිචාරයක් එනකල්ය.
උඹට දෙන්නංකො මං සෙක්ස් ස්ලේව්..’
