රාජපක්ෂලා විසින් තමන්ට හුරුපුරුදු පරිදි පේජ්කාරයන්ට මුදල් විසිකිරීමෙන් අරගලය දිය කිරීමට ඉරාජ් වර්ගයේ පාදඩ සෙක්ස්කරණය ආරම්භ කරලා තියෙනවා. අලුත්ම උත්සාහය වන්නේ ගෝල්ෆේස් එකේ කොන්ඩම් වැටී ඇතිබවට ප්‍රලාප කියමින් දෙමව්පියන් බියවැද්දීමට ගන්නා උත්සාහයයි. රාජපක්ෂවාදී බයියන්ට කොන්ඩම් එකක් යනු වල්කමක් මිස එය ආරක්ෂිත ලිංගික ක්‍රියාවක් පිළිබඳ දැනුවත් භාවිතාවක් නෙමෙයි. කොල්ලෙක් කෙල්ලෙක් අතින් අල්ලන් ඇවිද්දත් උන් කාමරයකට ගොස් රමණය කරනවා යැයි සිහින දැකීම රාජපක්ෂ බයිවාදයේ ලිංගික පීඩනයේ තරමයි. අපි මුලපටන් මේ රාජපක්ෂවාදය ලිංගික යටපත්කිරීමේ ප්‍රතිඵලයක් හැටියෙන් නිර්වචනය කලේ ඒ නිසයි. කාන්තාවන්ගේ මාසික ආර්තවය වෙනුවෙන් පාවිච්චි කරන පෑඩ් එකක් පවා ඔවුන්ට කතා කිරීමට ලැජ්ජා ඇතිකරන තරමේ පහත් දෙයක්. ලිංගිකත්වය ගැන පහත් ලෙස බැලීමත්, අපහාසාත්මක ලෙස දැකීමත්, එය සුන්දර මිනිස් ක්‍රියාවක් හැටියෙන් දකිනු වෙනුවට තිරිසන් හැසිරීමක් ලෙසින් දැනීමත් මේ මතවාදයේ ප්‍රධාන ලක්ෂනයක් වෙනවා. ඒ රාජපක්ෂවාදීන් සෙක්ස් කරන හැටියි.
රාජපක්ෂවාදයේ දියුණු විවෘත මනස් ඇතිවුන් ලෙසින් පෙනී ඉන්න හදන ප්‍රියන්ත හේවගේ මාතලන් ආදීන් පවා අවසාන‍යේදී මේ පහත් මානසිකත්වයේම දිගුවක් විතරයි. මේ සුවිශේෂ අරගලයේ පරම්පරාව තීරණාත්මක ලෙසින් මෙතනින් ඛණ්ඩනය වෙනවා. ඒ පරම්පරාව සෙක්ස්වලට බය පරපුරක් නෙමෙයි. ඉරාජ්ලාගේ කුණු සෙක්ස් ගෝත්‍රය නෙමෙයි. ඒ අය මේ කොන්ඩම් කතාවට ප්‍රතිචාර දක්වන්නෙ ලංකාවෙ බලාපොරොත්තු විය නොහැකි තරමෙ දියුණු තැනකින්.
‘බයවෙන්න දෙයක් නෑ. කොන්ඩම් දානවා කියන්නෙ ආරක්ෂිතයි කියන එකනෙ’
ඒ පරම්පරාව රාජපක්ෂවාදීන්ට මැද ඇඟිල්ල පෙන්නන්නෙ එහෙමයි. අනවශ්‍ය ගැබ්ගැනීම් සිදු නොවන, ලිංගික රෝග බෝ නොවන එකිනෙකාගේ කැමැත්තෙන් සිදුවන ලිංගික එක්වීම් ගැන තැතිගෙන කුලප්පුවෙන මානසිකත්වයක් ඒ පරපුරට නෑ. එහෙම මඩ ඒ අයගෙ ඇගේ තැවරෙන්නෙ නෑ.
මේ සෙක්ස් මඩ බාරගැනීමේ විලාසයම අරගලය විසින් නිර්මාණය කරන අලුත් පොලොව ගැන අපිට කියනවා. ඒක ලිංගික අසහනකාරීත්වයේ, පීඩනයේ බිමක් නෙමෙයි. ගැහැණුන් දූෂණය කරන, බලහත්කාරකම් කරන ප්‍රජාවක් නෙමෙයි. ඒක සෙක්ස්වලට බය නැති නිදහස් සුන්දර මිනිස් ප්‍රජාවක්.
ලංකාවෙ මේ විදිහෙ පාදඩ පෝස්ට් එකක් මේ තරම් දියුණු තැනකින් බාරගත්ත පළවෙනි වතාව මේක වෙන්න ඕන. පරණ වාමවාදීන් නම් පොලොවෙ හැපීගෙන කොන්ඩම් කතාව බොරුවක් කියන්න දඟලනවා අපිට දකින්න තිබුන. ඒ හරහා ඔවුන් රාජපක්ෂවාදීන් විසින් නඩත්තු කරන බයි මතවාදයේ ලිංගික පීඩාකාරී මානසිකත්වයම බෙදාගන්නවා. ඒත් මේ අලුත් පරම්පරාව සරල හිනාවකින් එය බැහැර කරනවා.
අරගලයේ මුල පටන්ම ලිංගිකමය සටන්පාඨවලට පැරණි වම බයෙන් තැති ගනිද්දි මේ තරුණ තරුණියන්, විශේෂයෙන් තරුණියන් බය නැතුව ඒ බෝඩ් ප්‍රසිද්දියේ ඉහළට ඔසවාගෙන හිටියා. මේ තමයි තීරණාත්මක බෙදුම්කඩනය.
‘අපි සෙක්ස්වලට බය නැති පරම්පරාවක්. අපි උඹලා වගේ වනචාරීන් නෙමෙයි. අපි ලිංගික අයිතිය පිළිගන්න පරපුරක්. අනෙකාගේ ලිංගික අයිතියට ගරු කරන පරපුරක්. අපිට සෙක්ස් කැත නෑ. ආදරේ ඇතුලෙ සෙක්ස් ලස්සනයි’
මේ තමයි අරගලයේ පරපුර දෑත් ඔසවාගෙන, එකිනෙකා ආදරෙන් වැළඳගෙන කියන පණිවුඩය. මේ වගේ සංස්කෘතික, ශිෂ්ට දුවෙක් පුතෙක් ගැන දෙමව්පියෙකුට බය වෙන්න දෙයක් නෑ. ඉරාජ් දැන් ඔයා හෙළුවෙන්.
එතන හිටපු අපිට පැහැදිලිව කියන්න පුළුවන් ලංකාවෙ වෙසක් බලන්න යනවට වඩා අරගල බිම ඔබේ දියණියට ආරක්ෂිතයි කියන එක.
