ගොඩක් වෙලාවට පෙම්වතියන්ගෙන් අහන්න ලැබෙන දෙයක් තමයි තමන්ගේ පෙම්වතා foreplayවලට දක්වන්නෙ අඩු පෙළඹීමක් කියන එක. කාන්තාවන්ගෙ පැත්තෙන් ගත්තොත් සෙක්ස්වල වැදගත්ම කොටස වෙන්නෙ මේ foreplay නැත්නම් පූර්ව ලිංගික ක්‍රියාකාරකම් කොටස. ඒ කියන්නෙ සිපගැනීම්, ස්පර්ශයන්, ලෙවකෑම්, වැළඳගැනීම්, කනිලිංගස්, දිවෙන් තොල්වලින් ලිංගයන් උත්තේජනය කිරීම්, ආදර වදන් තෙපලීම් ආදිය. මේ දේවල්වලින් කාන්තාවක් සුවිසල් ලිංගික ආස්වාදයක් ලබනවා. ඇගේ යෝනි ශ්‍රාවයන් හොඳින් නිකුත්වෙමින්, පියයුරු තුඩු ඉදිරියට නෙරා එමින් ඇයව මත් කරන්නෙ මේ foreplay එක විසින්. ඒ තමයි අනුරාගී කොටස. ශෘංගාර ඉසව්ව. මේ කොටස මගහැරීම නිසා බොහෝ විට කාන්තාවක් පූර්ණ ලෙස තෘප්තිමත් කිරීමේ අවස්ථාව පිරිමියෙකුට අහිමි වෙනවා. සංසර්ගයෙන් පමණක් ගැහැණියක් සුරතාන්තයට පත්වීම ඉතා දුර්ලභ කාරණයක්. ඇයට විඳින්න හැගීම් දැනීම් ගොඩක් ඕන. ප්‍රාණවත් ශිෂ්නයක් ඉහළ පහළ යාම පමණක් මදි. ඒ වගේම ඒක බෝරිං.
නමුත් පොදුවේ පිරිමි බහුතරයකට මේ foreplay සඳහා අවශ්‍ය ඉවසීම, සංයමය නෑ. ආරම්භයටත් පෙර ප්‍රාණවත්ව ඇති ශිෂ්නය හැකි තරම් ඉක්මණින් ඇගේ යෝනිය තුලට ඇතුල් කිරීමේ දැඩි උවමනාවකින්, කලබලයකින් පිරිමියා පෙලෙනවා. ඒක තමයි පිරිමියාගේ තෘප්තිය පවතින ඉසව්ව. මුඛ හෝ යෝනි සංසර්ගය තමයි පිරිමියෙකුගේ ප්‍රධාන මෙහෙයුම වෙන්නෙ. මුඛ සංසර්ගයත් foreplay එකක් වුනත් ඊට වඩා බොහෝ දේ මෙතනට එකතු වෙන්න ඕන.
මේක ඇත්තටම පිරිමියෙකුට ජීව විද්‍යාත්මකවම දැනෙන හදිස්සියක් වෙන්න පුළුවන්. හැකි තරම් ඉක්මණින් ධාතු පිටකිරීමෙන් වර්ගයා බෝ කිරීමේ ස්වභාවික පෙළඹවීම මෙතන පවතින්න පුළුවන්. ඒ වගේම පිරිමියෙක් බොහෝ කාලයක් හුරුවන ලිංගික චර්යා‍ව නැත්නම් සංස්කෘතිය විසින් මේ තත්වය ඇති කරනවා වෙන්නත් පුළුවන්. උදා විදිහට වැඩිම කාලයක් ස්වයං වින්දනයෙන් තෘප්තිමත් වෙන පිරිමියෙක් ලිංගික තෘප්තිය සම්බන්ධයෙන් ශෘංගාරහරණය වූ චර්යාවකට නොදැනීම හුරු වෙන්න පුළුවන්. මේ කියන්නෙ ස්වයං වින්දනය නරකයි කියන එක නෙමෙයි. ඒක චර්යාමය ඇබ්බැහියක් විදිහට පවතින්න පුළුවන් කියන එකයි. සමහර පිරිමි ඉන්නවා කොයිතරම් වෙලාවක් සංසර්ගයේ යෙදුනත් ස්වයං වින්දනයේ යෙදීමෙන්ම පමණක් අවසානයේ සුරතාන්තය ලබන.
ඒ වගේම අපේ අනුරාගය සඳහා නිතර නරඹන පෝර්න්වලින් අපිව කන්ඩිෂන් කිරීමක් සිද්ද වෙන්නත් පුළුවන්. බොහෝ විට පෝර්න් නිර්මාණය වෙන්නෙ පිරිමි ආස්වාදය කේන්ද්‍ර කරගෙනයි. එරිකා ලස්ට් වැනි අධ්‍යක්ෂවරියන් කීප දෙනෙක් විසින් කාන්තාවන්ගේ ආස්වාදය මුල්කරගත්, female gaze එකෙන් පෝර්න් නිර්මාණය කළත් අපි නරඹන බොහොමයක් පෝර්න් පිරිමියි. මේ පිරිමි පෝර්න්වල කේන්ද්‍රීය කාරණය වෙන්නෙ ශිෂ්නයයි. ඒ වගේම ෆාස්ට්ෆෝර්වර්ඩ් යවමින් ඉක්මන් තෘප්තියක් පිණිස හඹා යන පුරුද්දකුත් පෝර්න් සමග එනවා. මේ ක්ෂණික රසය කාලයත් සමග අපේ පුරුද්දක් වෙනවා. අනෙකා ගැන සිතීම, අනෙකා සමග සංවාද සංවාසය වෙනුවට ශාරීරික, ක්ෂනික මෝචන ආස්වාදයකට අපි නැඹුරු වෙනවා.
මේක කොහෙත්ම අස්වාභාවික තත්වයක් නෙමෙයි. පිරිමි රති සංස්කෘතිය විසින් නිර්මාණය කළ තත්වයක්. මෙතනදි අවාසනාව වෙන්නෙ රමණයක පූර්ණත්වය අපිට විඳින්න බැරි වෙන එකයි. අනෙකා සමග ඇති බැඳීම, ඒකත්වය අපිට මගහැරෙන එකයි.
ඒ නිසා සිහියෙන් යුතුව ශෘංගාරාත්මක රමණය පුහුණු වෙන්න අවශ්‍යයි. එතනදී පුළුවන් තරම් විවේකී වීම, කාලය ගැනීම සිතාමතා කරන්න වෙනවා. ගැහැණියට සම්පූර්ණයෙන් ඉඩදීම මෙතනදි වඩා ප්‍රායෝගිකයි. වැදගත්ම දේ වෙන්නෙ රමණයේ ස්ත්‍රී මොහොත ඉස්මතු වෙන්නට අවස්ථාව සැලසීම. ඇගේ ආස්වාදයට ප්‍රමුඛතාවය දීම. අනෙකාගේ තෘප්තිය වෙනුවෙන් වැයවීමෙන් මිස රමණයේ පූර්ණත්වය ළගා කරගත හැකි වෙන මගක් නෑ. ඒ පරාර්ථය ඇතුලෙයි සුරතාන්තය තියෙන්නෙ.
පළමු වර අලුත්බව සහ නොඉවසිල්ල නිසා කලබලය සියල්ල අභිභවා මතුවෙන්න පුළුවන්. ඒත් හැමවිටම දෙවෙනි වරකට ඉඩ තියාගන්න. ඒ කලබලය මුදා හැරි පසුව භාවනානුයෝගීව දෙවෙනි වටයට මුලපුරන්න. ශිෂ්නයේ යාන්ත්‍රික බව වෙනුවට නිර්මාණාත්මක මුහුවීමේ ආස්වාදය විඳින්න.
foreplay කියන්නෙ සෙක්ස්වලදි ස්ත්‍රිය විසින් දොරගුළු විවර කරන තැන. එය මගහැරීමෙන් අපි කරන්නෙ පඩිපෙල ළගම මෝචනය.
ඒ වගේම කාන්තාවගේ පැත්තෙනුත් මෙතනදි යම් කොටසක් එකතු වෙන්න ඕන. පිරිමියා විසින් දෙනු ලබන දෙයක් පමණක් නිහඩව විඳිනවා වෙනුවට ලිංගික එක්වීමක් කියන්නෙ දෙන්නාගේම සහභාගීත්වයක් විදිහට තේරුම් ගන්න ඕන. පිරිමියාට අවශ්‍ය දේ ලබාදෙන අතරම තමන්ගේ ආස්වාදය පිණිස 69 වගේ පොසිෂන් පාවිච්චි කරන්න පුළුවන්. ඒ වගේම පිරිමි කලබලය නිවිය හැකි සොඳුරු පාලනයන් තමන් අතට ගන්න පුළුවන්. තමන් හුදු ඔහුගේ ආස්වාදය පිණිස පවතිනවා නොව, තමන්ද ආස්වාදය වෙනුවෙන් පොරබදන බව ඔහුට දනවන්න ඕන.
රමණීය රමණයකදි දීම වගේම ලබාගැනීමත් අනිවාර්ය සාධකයි.
Foreplay කියන්නෙ ඇඳ උඩදි සිද්ද වෙන දෙයක් විතරක් නෙමෙයි. දවසෙ ඇය ගැන කරන ආදරණීය ප්‍රශංසාවක්, ඇය වෙනුවෙන් ගේන පුංචි තෑග්ගක්, සෙක්ස්ට් මැසේජ් එකක්, ආදරණීය හාදුවක්, එකට කුස්සියේ උයන එක පවා foreplay එකක් වෙන්න පුළුවන්. මේ පුංචි පුංචි ශෘංගාර මුහුවීම් ඇයව වඩාත් උණුසුම් කරන්න පුළුවන්.
ඒ වගේම යහන්ගත වෙන්න කලින් අපි අහන සංගීතය, අපි විඳින සුවඳ, ගෙදර ආලෝකකරණය, සමහර විට ඉටිපන්දම් දැල්වීම මේ සියල්ලත් foreplay පරිචේඡදයට අයිතියි. මේ තමයි රමණයක් සිදුවිය යුතු ශෘංගාර විශ්වය. ඒක බොහොමත්ම ඉවසිලිවන්තයි. බොහොමත්ම නිර්මාණශීලීයි. සංසර්ග මොහොත කොයිතරම් කාලයක් පමා කරමින් මේ ශෘංගාර කලාපය සුවිසල් කරගැනීමයි රමණයේ කලාව දන්නවුන් කරන්නෙ.
