මම මොකක් හරි ආර්ට් එකක් අඳිද්දි හරි මොනා හරි දෙයක් ලියද්දි මං කැමතියි ඒක erotic පැත්තට බර වෙන්න කරන්න. ඒකෙ සෞන්දර්යය දන්නෙ creative කෙනෙක්ම තමයි. කොටින්ම කිව්වොත් මං R-rated නැති, සෙක්ස් නැති නිර්මාණයක් කියවන්න, බලන්න කැමතිත් නැති තරම්. ඒත් මම ගොඩක් වෙලාවට මගේ නිර්මාණ පෝස්ට් කරන්නෙ නෑ. ඒකට හේතුව එහෙම දෙයක් පළ කරාම පිරිමි පාර්ශවයෙන් එන requests සහ Messages තොගය. එතකොට මට හිතෙන්න ගන්නවා මේ මගේ ආර්ට් එක හරි ඒකෙ යම්කිසි හොඳක් හරි නිසාම ලැබෙන ප්‍රතිචාරද කියල. ඒ වගේම මෙහෙම ප්‍රතිචාර දක්වන බහුතරයක් පිරිමි පාර්ශවය erotic නිර්මාණයක් කරන්න තරම් ගැහැනියක් විවෘත නම් ඇය වෙනත් ඕනෑම දෙයකට විවෘතයි කියලා වරදවා වටහා ගන්නවා. සමහරු එය විවේචනයක් හා අපහාස කිරීමක් දක්වා ගෙන යනවා. මේක මේ මාතෘකාව ගැන නිතර ලියන කියන පිරිමි පුද්ගලයෙකුට පවා සිද්ධ වෙන දෙයක්. එහෙම කෙනෙකුට ‘බඩු කාරයෙක්’ ‘අසහන කාරයෙක්’ වගේ නම් පට බැඳෙන්න පුළුවන්. ගැහැනු කෙනෙක් සෙක්ස් ගැන ලියන කියනවා නම් එය හෙලා දකින පාර්ශවය ඇයට පට බැඳිය හැකි නම් ගැන අමුතුවෙන් කියන්නට අවශ්‍ය නෑ. ඒත් මේ සටහන ඒ පාර්ශවය ගැන නෙවෙයි. මේ කියන්න උත්සහ කරන්නෙ erotic නිර්මාණ කරන ඒ ගැන විවෘතව අදහස් පළ කරන ගැහැණියක්‌ උත්කර්ෂයට නගමින්, (ඒ නිර්මාණ ගුණාත්මක නැති අවස්ථා වලදී පවා) ඇයගේ පෞද්ගලිකත්වයට බාධා කරමින් වෙනත් අරමුණු ඉටු කර ගන්නට උත්සහ කරන පාර්ශවය ගැන.
දෙදෙනෙකු කැමැත්තෙන් කරන පෞද්ගලික සංවාද හා සබඳතා ගැන කතා කරන්න මට අයිතියක් නෑ. නමුත් කාන්තාවක් සෙක්ස් ගැන යමක් විවෘතව කතා කළ පමණින් ඇයට massages යවමින්, ඒවාට පිළිතුරු නැති විට “පෙන්නන තරම් විවෘත නෑ”, “ලියන ඒවයේ හැටියට කිසි ගැම්මක් නෑනෙ.” කියමින් අපහාස කරමින් හා විවේචනයට ලක් කරමින් සමහරෙකු හැසිරෙන අවස්ථා ගැන ගොඩක් කාන්තාවන්ට අත්දැකීම් ඇති.
සෙක්ස් ගැන ලියන කාන්තාවකට එසේ ලියන පමණින් ඔබ හා විවෘත වෙන්න අවශ්‍යද? (ඔබ හා පෙර සිටම මිත්‍රත්වයක් තිබෙන තත්වයකදී වුණත්.) ඇයට ඔබ කරන කියන ඕනෑම දේකට එකඟ වෙන්න ගැම්මක් තිබිය යුතුද? උදාහරණයක් විදිහට ඇය ඇයගේ ෆැන්ටසියක් ගැන ලියනවා කියමු. ඇය සැබෑ ජීවිතයේදීත් ඒ ෆැන්ටසිය ක්‍රියාත්මක කිරීමට නොබිය විය යුතුද? එය ඇය සිතින් නිර්මාණය කරන හුදු ෆැන්ටසියක්ම පමණක් විය නොහැකිද? එය ක්‍රියාත්මක කිරීම අවශ්‍යමද? ෆැන්ටසියක් කියන අදහසම ඔබ වැරදියට වටහාගෙන නෙවේද? ක්‍රියාවට නංවන්නට ගියොත් තම ෆැන්ටසිය විනාශ වීමක් වෙයි හරි අප්‍රසන්න වෙයි හරි කෙනෙක්ට හිතෙන්න පුළුවන් නේද? කෙනෙකුට තමන්ගේ ෆැන්ටසි සිතේ මැවෙද්දි හරි porn video එකක බලද්දි හරි පමණක් රසවත් වෙන්න පුළුවන් නේද? ගොඩක් කාන්තාවන්ට ඔවුන්ගේ ෆැන්ටසි ඒ වගේ. මේ අතරේ සියළු දේ අත් හදා බලමින් අත්විඳින්න ආශා කරන කාන්තාවන් කොටසක්ද ඉන්නවා. (ආශාවන් යටපත් කර ගැනීම උරුම වෙච්ච කාන්තාවන්ට ලිංගික නිදහසේ උපරිමය භුක්ති විඳීමට හැකි විය යුතුයි.) මේ සටහන හැබැයි ඔවුන් ගැන නෙවෙයි.
උදාහරණයකින් පැහැදිලි කරනවා නම්, හැම කාන්තාවක්ම මද වශයෙන් හරි සමලිංගිකයි එහෙම නැත්තන් හැම කාන්තාවක්ම මුළුමනින්ම විරුද්ධ ලිංගික නෙවේ ද්වී ලිංගිකයි කියල කියන තර්කයක් තියෙනවා. හැබැයි මේ උපකල්පනය සංකීර්ණ කරන සාධක කීපයක් සැලකිල්ලට නොගෙනයි ඉහත අධ්‍යයනය කරලා තියෙන්නෙ. එකක් තමයි කාන්තාවකගේ ලිංගික අවයව කරන දේයි ඇගේ මානසික, ආත්මීය මට්ටමේ උද්දීපනයයි අතර ගැලපීම 10%ක් අවස්ථා වලදි පමණක් පවතින එක. අනික් අවස්ථා වලදි කාන්තාවන්ගෙ උද්දීපනයේ නොගැලපීමක් (Arousal nonconcordance) ප්‍රදර්ශනය වෙනවා. ඒත් පිරිමින්ගෙ ලිංගික අවයවයි ඔවුන්ගේ ආත්මීය උද්දීපනයයි, ඒ කියන්නෙ මොළයේ ක්‍රියාකාරීත්වයයි අතර ගැළපීම 50% ක්. ඒ නිසා ඔහුට ලිංගිකව ආකර්ශනීය යැයි පෙනෙන දෙයක් නිසා ශිෂ්නය ඍජු වීම 50% ක් අවස්ථා වලදී වෙනවා. ඒත් කාන්තාවන්ගෙ 90% ක්ම ඇගේ ශරීරය හා මොළය සම්පූර්ණයෙන්ම වෙනස් තරංග ආයාමයක පවතින්නෙ. වෙනත් වචන වලින් කිව්වොත්, කාන්තාවකගේ ලිංගික අවයව ලිංගිකව අදාළ යැයි සලකන ඕනෙම උත්තේජකයකට ප්‍රතිචාර දක්වනවා. (චිම්පන්සියන් ලිංගිකව හැසිරෙන අයුරු දැකීමෙන් පවා), ඒත් එයින් අදහස් කරන්නේ කාන්තාවන්ට අනිවාර්යයෙන්ම තමන් දකින උත්තේජක ලිංගිකව ආකර්ශනීය බව හරි රහසිගතව ඒවා අත්හදා බලමින් ක්‍රියා කරන්න අවශ්‍ය බව හරි නෙවේ.
මේ උද්දීපන නොගැලපීම (Arousal nonconcordance) කාන්තාවන්ට ව්‍යාග්‍රා නිර්දේශ කිරීම වැඩ නොකරන්න එක හේතුවක්‌. ව්‍යාග්‍රා පිරිමි සහ ගැහැනු යන දෙපාර්ශවයේම ලිංගික අවයව වලට රුධිර ප්‍රවාහය වැඩි කරනවා. ඒත් කාන්තාවන්ගේ ලිංගික අවයව වලට සාපේක්ෂව මොළයේ සැබවින්ම උද්දීපනයක් එහිදි සිදු වෙන්නෙ නෑ. මානසික උද්දීපනය කාන්තාවන්ට ඇදහිය නොහැකි තරම් වැදගත් දෙයක්. එය සරලව lubricants වලින් කරන්න පුළුවන් දෙයක් නෙවේ.
කාන්තාවන් rape scene එකක් animal sex scene එකක් දැකීමෙන් වුණත් ශාරීරිකව උත්තේජනය වෙන්න පුළුවන්. ඒත් එහි අදහස ඇය ඊට කැමැත්තක් දක්වන බව හෝ එය අත්විඳීමට ආශා බව නෙවේ. ඇය අකැමැත්තෙන්ම ඇගේ ලිංගික අවයව එයට ප්‍රතිචාර දැක්විය හැකියි. අනෙක් කරුණ තමයි ගැහැණු ශරීරය ලිංගිකව උත්කර්ෂයට නංවා ඇති සංස්කෘතියක කාන්තාවක් තවත් රූමත් ශරීරයක් හිමි කාන්තාවක් හැම්බර්ගර් එකක් පාව්ච්චි කරමින් ලිංගික ක්‍රියාවලියේ යෙදෙනවා දැකීමෙන් උත්තේජනය වීම සාමාන්‍යයි. ඒත් එයින් කියවෙන්නෙ ඇය තවත් කාන්තාවක් සමග හරි හැම්බර්ගර් එකක් එක්ක හරි ලිංගිකව හැසිරීමට කැමති බව නෙවේ. ලිංගික ආශාව, උද්දීපනය සහ අනන්‍යතාවය කියන සියල්ලම කාන්තාවන් සම්බන්ධයෙන් ගත්තම නිතර එකිනෙකා සමඟ ගැටෙන සංකීර්ණ බලවේග. මේ අනුව හැම කාන්තාවක්ම අඩු වැඩි වශයෙන් ද්වී ලිංගික නැඹුරුතා දක්වනවා යන තර්කයේ ගැටළු සහගත බවක් මතු වෙනවා. කොහොමත් ලිංගිකත්වය කියන්නෙ හැමදාමත් අධ්‍යයන මට්ටමේ පවතින ඉතා සංකීර්ණ විෂයක්. එයිනුත් ගැහැණු ලිංගික ආශාවන් සම්බන්ධයෙන් ගත්තම අපට ඇසට පෙනෙනවාට වඩා නොපෙනෙන බොහෝ දේ තියෙනවා.
ඔබ ඇතැම් කාන්තාවො සෙක්ස් සම්බන්ධ විවෘත පිරිමින්ව අසහනය යයි කියමින් උපහාසයට ලක් කරන අයුරු දැක ඇතුවාට සැක නැහැ. පුරුෂ ලිංගික උද්දීපනයේ ස්වභාවය ගැන දැනුමක් නොමැති කම ඊට හේතුව වෙන්න පුළුවන්. ඒ වගේම ගැහැණු ලිංගික උද්දීපනයේ සංකීර්ණ භාවය ගැන මැසිවිලි නගන පිරිමිත් ඔබ දැක ඇති. මේ දැනුම ලබා ගන්න හොඳම විධි නම් දෙදෙනා අතර එකිනෙකා ගැන සංවේදී, හොඳ සන්නිවේදනයක් පවත්වා ගැනීමත් අත්දැකීම් තුළින් ඉගෙන ගැනීමත් කියන දේවල්. ඒත් විද්‍යාත්මක කරුණු දැන සිටීම අඟහරු හා සිකුරු ජීවීන්ට සමාන පිරිමියා හා ගැහැණිය අතර සබඳතා වලදි වැදගත් වෙන්න පුළුවන්.
ඉහත උදාහරණය වගේ උපකල්පන මත රඳා පවතිමින් සෙක්ස් ගැන විවෘතව කතා කරන ගැහැනියක් කාන්තා ලිංගික නිදහස හා විවෘත භාවය නාමයෙන් දේශනා දෙමින් අපහසුතාවයට පත් කරන එක අනුමත කරන්න බැරි දෙයක්. එය එවන් ගැහැනියක් හෙලා දකිමින් අපහාස කරනවා වගේම වැරදි ක්‍රියාවක්. අපි නිදහස පිළිගන්න ගරු කරන, ඒ වචනයේ තේරුම දන්න මිනිසුන් නම් ගැහැනියක් හෝ වේවා හෝ පිරිමියෙක් වේවා ඕනෑම ආකාරයක බලහත්කාරයක් අශිෂ්ටයි. ඕනෑම පුද්ගලයෙක්ට තමන්ගේ terms වලට අනුව නිදහසේ විකසිත වෙන්න දිය යුතුයි. ගැහැනියකගේ ලිංගික ආශාවන් හා කැමැත්තත් ඒ වගේ. බලපෑම් වෙන තැන ඇය හැඟීම් දැනීම් හකුළා ගෙන කිසි දාක විවෘත නොවී සිටින්න පුළුවන්. සෙක්ස් ගැන කතා කරන්න උනන්දු කාන්තාවොත් මේ තත්වය නිසා විවෘත අවකාශයේ ඒ ගැන කතා කරන්න මැළි වේවි. ලංකාව වගේ රටක කාන්තා ලිංගිකත්වය, ආශාව, සුරතාන්තය, ලිංගික නිදහස ගැන අපේ දැනුමට හැමදාම මග ඇහිරිලා තියේවි. විවෘත නෑ කියමින් බලපෑම් කරනවා වෙනුවට ඇයටම විකසිත වෙන්න ඉඩ හරිමින් දිරියක් වෙන්න පිරිමි පාර්ශවයට පුළුවන්. සමාජ මාධ්‍ය අවකාශයේ පමණක් නෙවේ හොඳ සන්නිවේදනයක් එක්ක පෞද්ගලික සබඳතා වලදිත් ඒක උදව්වක් වේවි.
නැතිනම් ගැහැනු ලිංගිකව විවෘත අඩු ඇයි යන ප්‍රශ්නෙ අපිට හැමදාම අහන්නට වේවි.
