ආර්තික අර්බුදය හින්දා ලංකාවෙ කාන්තාවන්ට වි‍ශේෂ වූ ප්‍රශ්න ඇතිවෙනවා. ඒ අයගෙ රැකියා නැති වෙනවා. මෙහෙම රැකියා නැතිවෙන බොහොමයක් පිරිස් ගණිකා වෘත්තියට එකතු වෙමින් පවතිනවා කියලා ඒඑන්අයි පුවත් සේවය වාර්තා කරනවා.
කාන්තාවන්ගේ රැකියා අහිමිවීම නිසා ඒ අයගෙ පවුල්වල දුෂ්කරතා මතුවෙනවා. මේ හේතුවෙන් දිවිනසා ගන්නා අය ගැන පවා පුවත් වාර්තා වෙනවා. නමුත් ඊට වඩා ධෛර්යය සම්පන්න කාන්තාවන් තමන්ගේ ජීවිතයේ දැවැන්තම අභියෝගයක් බාරඅරගෙන, තමන්ට ප්‍රමාණවත් මුදලක් උපයාගත හැකි එකම මාධ්‍යය විදිහට විවෘත වෙලා තියෙන ලිංගික ශ්‍රමික කලාපයට ඇතුප්වෙනවා.
ANI පුවත්සේවය වාර්තා කරන විදිහට මේ නිසා රටේ ගණිකා නිවාස වැඩිවීමක් සිදුවෙමින් පවතිනවා. පහුගිය මාස කීපයේ පමණක් ගණිකා වෘත්තියේ 30%ක පමණ වර්ධනයක් පෙන්වනවා. ලිංගික ශ්‍රමිකයන්ගේ අයිතීන් වෙනුවෙන් වැඩකරන සංවිධානයක් වන ස්ටෑන්ඩ්අප් මූව්මන්ට් ලංකා පෙන්වා දෙන විදිහට මේ කාන්තාවන් බොහොමයක් මේ රැකියාවට යොමුවෙන්නෙ තමන්ගේ ජීවිතය පවත්වාගෙන යාමේ දුෂ්කරතා නිසයි. මේ කාන්තාවන් තමයි බොහොමයක් පවුල්වල උපයන්නා වෙන්නෙ. සමහරුන්‍ දරුවන් එක්ක දික්කසාදව ජීවත් වෙන අය. තවත් සමහරුන්ගේ සැමියන් කිසිදු ඉපැයීමක් කරන්නෙ නෑ. සමහරු ජීවත් වෙන්නෙ මහළු දෙමව්පියන් සමග. මේ තමයි ඒ අයට තමන්ගෙ පවුල ජීවත් කරවන්න ගන්න තිබුණු එකම මාර්ගය.
විශේෂයෙන්ම ඇගළුම් ක්ෂේත්‍රයේ විශාල වශයෙන් රැකියා අහිමි වීමක් සිදු වෙනවා. මෙහෙම රැකියා අහිමි වෙන බොහොමයක් දෙනා ගණිකා වෘත්තියට යොමුවන නැඹුරුවක් පේන්න තියෙනවා. ගොඩක් අයට සිද්ද වෙන්නෙ ස්පාවල රැකියා හොයාගන්න.
සැ.යු- ගණිකාව යන වචනය අප පාවිච්චි කරන්නේ සිතාමතාමය. එය ඉන්දියාවේ ගණිකා යන ප්‍රභූමය, ගෞරවනීය වෘත්තිය සම්බන්ධ සැබෑ අර්ථය නැවත අත්පත් කරගත යුතු බවට අපි විශ්වාස කරනවා.
රෙහානා කියන අවුරුදු 21ක තරුණියකගේ ප්‍රකාශය අනුව මාස 07ට කලින් එයාගෙ ඇගළුම් රැකියාව නැති වීම නිසා පවුලට ආදායමක් නැති වෙනවා. එයාට ස්පා හිමිකරුවෙක් ලිංගික ශ්‍රමිකයෙක් විදිහට රැකියාව කරන්න කතා කරනවා. මුලින් ප්‍රතික්ෂේප කළත් ඒ තිබුණු ආර්තික තත්වය නිසාම එයාට සිද්ද වෙනවා මේ රැකියාවට එන්න.
අවුරුදු 42ක රෝසි කියන කතාව අනුව ඇය අවුරුදු 07ක දරුවෙකුගේ මවක්. දික්කසාද වෙලා ජීවත් වෙන්නෙ. තමන්ගේ දරුවා‍ගෙ අධ්‍යාපන කටයුතු කරගෙන යන්නවත් ඇයට ලැබෙන ආදායම මදි වෙනවා. ඇය මෙතෙක් කරගෙන ගිය පොඩි කඩේ මේ ආර්තික අර්බුදයත් එක්ක පවත්වාගෙන යන්න අමාරු තත්වයක් එනවා. මේ හින්ද ඇයට සිද්ද වෙනවා ලිංගික ශ්‍රමිකයෙක් විදිහට සේවය කරන්න.
ඇත්තම තත්වය නම් රුපියල් 15000-20000ක් පමණ මුදලක් මාසයකට උපයපු කාන්තාවකට පුළුවන්කම ලැබෙනවා ලිංගික ශ්‍රමිකයෙක් විදිහට දවසකට එබඳු මුදලක් උපයාගන්න. ඒක ආකර්ශනීය තත්වයක්.
ස්ටෑන්ඩ්අප් මූව්මන්ට් ප්‍රකාශ කරන ආකාරයට මේ ආර්ථික අර්බුදය හමුවේ බොහොමයක් කාන්තාවන්ගේ සැමියන් ඔවුන් හැර ගොස් තිබෙනවා. මේ නිසා ජීවත් වෙන මාර්ගයක් නැතිකමෙනුත් ලිංගික ශ්‍රමිකයන් විදිහට වැඩ කරන අය ඉන්නවා. මේ අය උපත් පාලන ක්‍රමයන් ගැන නොදැනුවත් සහ නොසැලකිලිමත් බව නිසා ගැබ් ගැනීම් සිද්ද වෙනවා. මේ වෙද්දි ඉහත ආයතනය විසින් එවන් ගැබ්ගැනීම් සිදුවුනු කාන්තාවන් දෙදෙනෙක් රැකබලාගන්නවා. රජයෙන් කිසිම සහායක් මෙවැනි ගැහැණුන් වෙනුවෙන් ලැබෙන්නෙ නැහැ.
ශ්‍රී ලංකා සෙක්ස් පක්ෂය හැටියට අප යෝජනා කරන්නෙ මේ පවතින ආර්ථික අර්බුදය ගැන සබුද්ධිකභාවයකින් රජයට ලිංගික ශ්‍රමික වෘත්තිය අපරාධහරණය කරන ලෙසයි. එය අභියෝගාත්මක තීරණයක් බව ඇත්ත. නමුත් මානුෂිකබව සියල්ලට ඉහළින් සැලකූ රජයක සානුකම්පික තීරණයක් හැටියට යම් දවසක අගය කරනු ඇත.
මෙවන් ප්‍රවෘත්තියක් ලැබුනු විගස පොලිසි මගින් සිදුකරන ගණිකා නිවාස වැටලීම් සහ ඒවා මහා ප්‍රවෘත්ති වශයෙන් මීඩියාවල පළකිරීම වහාම නතර කරන්න පියවර ගන්න. අපට මේ කාන්තාවන්ගේ ආර්තිකය රැකබලාගත නොහැකි නම් අවම වශයෙන් ඔවුන් මුදලක් උපයන වෘත්තියේ ආරක්ෂාව වෙනුවෙන් වගකීම්සහගත වෙන්න. මේ අයට නීතිමය සහ සෞඛ්‍යමය රැකවරණ සැලසීමට අවකාශ ලබාදෙන්න.
මේ අයට උපත් පාලනය සහ ලිංගික රෝගවලින් ආරක්ෂා වීම පිළිබඳ දැනුම ලබාදීමට ඉක්මන් පියවර ගැනීම අවශ්‍ය වෙනවා. ඒ වගේම පෝලිම්වල, විවිධ අර්බුද මැද ජීවත් වෙන පිරිමින්ගේ ආතතිය පුපුරා යාමට නොදී සමනය කිරීමට මේ කාන්තාවන් විසින් කරන සමාජ සේවය පිළිගත යුතු වෙනවා.
ගණිකා වෘත්තිය යනු අනෙක් කවර හෝ වෘත්තියක් තරමටම ගෞරවනීය වෘත්තියක් බව අපගේ පක්ෂයේ පිළිගැනීමයි. අනෙක් වෘත්තීන් හා සමානවම එයට වෘත්තීමය අයිතිවාසිකම් හිමිවිය යුතුය. එය කාන්තාවක් විසින් ස්වාධීනව, තමන්ගේ තීරණයෙන්, තමන්ගේ ශරීරයෙන් හා ශෘංගාරයෙන් මුදල් උපයන නිදහස් රැකියාවක් විය යුතුය. රජයන්ගේ වැරදි ප්‍රතිපත්ති නිසා බංකොලොත් වූ ආර්තිකයක ගැහැණුන් ජීවත් වීම වෙනුවෙන් කරන කර්මාන්තයකට අකුල් හෙලීමට තරම් අමානුෂික, ඊනියා සදාචාරාත්මක රජයක් බවට මේ නව රජය පත් නොවනු ඇතැයි අපි අපේක්ෂා කරනවා.
මෙයට, ශ්‍රී ලංකා සෙක්ස් පක්ෂය.
