මේ පැරණි සඟරාත් අලුත් අසභ්‍ය ප්‍රකාශන නීති යටතේ තහනම් වෙලා යන්න පුළුවන්. මේවා නැවත පළකිරීම පවා අසභ්‍ය අශ්ශීල වෙන්න පුළුවන්. හතලිස් ගනංවල තිබුණු නිදහසත් අද අහිමි වෙන්න පුළුවන්. ඉතිං පණත් සම්මත වෙන්න කලින් අපිට මෙහෙම අතීතයක් තිබුණ කියල රසවිඳින්න.
“නව ව්‍යාපාර පටන්ගන්නේත්, නව නිපදවීම් ඇති කරන්නේත්, නව පන්නය ඇති කරන්නේත්, නවකයන් පුහුණු කරන්නේත්, නවකලා බෝ කර ඒවාට පණ පොවන්නේත් හුදෙක් කාම ශක්තිය ඇති පුද්ගලයෝමය.
සමාජය දෙස බලන්න. හොඳම කලාකාරයා, හොඳම ශිල්පියා, නිෂ්පාදකයා ආදී හොඳ වැඩකාරයො සියලු දෙනාම කාමශක්තියෙහි හස්තිබල ඇත්තෝය. එය මට නිර්භයවම කිව හැකි කාරණයකි. මා දන්නා බොහෝ කීර්තිමත්, බොහෝ දක්ෂ, බොහෝ විනෝදකාමී ඉතා හොඳ කෙරුම්කාරයෝ බොහෝ දෙනා මහා කාමාධික පුද්ගලයෝය. ඔවුන් කෙතරම් කාම ශක්තිමත්ද කිවහොත් ඇතැම් විට ඔවුන් ශිෂ්ට ජනසමාජයට නුසුදුසු තරම්ය.
කාමාධික පුද්ගලයෝ රටකට සමාජයකට උවමනා පිරිසකි. ඇයි?
ඒ ඔවුන් නොම්මර එකේ මනමාලයෝය. ඔවුන්ගේ ඒ මනමාලකම විදහා දැක්වීම පිනිස ඔවුන්ට රසට කෑමබීමත්, ලක්ෂනට අඳින්නට පළඳින්නටත්, අතදිග හැර වියදම් කරන්නටත් උවමනාය. ඒ උවමනාකම් නිසා ජනසමාජයේ කීදෙනෙක් යැපෙන්නේදැයි සිතන්න”
– ගිහිගේ සඟරා කර්තෘ 1948
ඒ කාලෙ මිනිස්සුන්ට තිබුණු දැනීමවත් අද සමාජයේ අයට නැති එක කණගාටුවට කාරණයක්.
ගිහිගේ වැඩිහිටි සඟරාව සමග තවත් ගොඩක් කාම පොත්වල දැන්වීම් පළකල බවක් පේනවා. රුපියල් දෙකක් වන මේ සඟරා ලිපිණයැති කවරයක් සමග ඉල්ලුම් කිරීමෙන් තැපෑලෙන් ගෙන්න ගන්න පුළුවන්. මගුල් රහස කියන පොතේ පෙම්වතියක් තෝරගන්න හැටි, සිපගන්නා හැටි, දුනුවිල නිලමේ සහ ගජමන් නෝනාගේ ප්‍රේම කතා, මගුල් දවසෙ මුලින් කරන්න ඕන දේවල් වගේ ලිපි පලවෙනවා. ඒක ඇල් ඩීඩී කරුණාරත්නගේ වැඩක්.
වාතස්‍යානගේ කාමසුත්‍රයෙන් උපුටාගෙන පලවෙන ලිංගික බෙලහීනතාවය දුරු කරන ප්‍රතිකාර නම් අත්හදා බැලීම භයානකයි. ඒවා එත්නොඉරොටිසම් නැත්නම් අතීතයේ කාලයත් සමග විකාශනය වුනු ශෘංගාර විෂයක සුන්දරත්වය විඳින්න මිස විද්‍යාත්මක ප්‍රතිකර්ම හැටියෙන් ගැනීම අමනෝඥයි. කූඩැල්ලන්ගෙන් කඩියන්ගෙන් හිඳින තෙල් පුරුෂ ලිංගය කෙලවරේ ආලේප කිරීම වගේ අද්භූත අත්බෙහෙත් එතන නියම කරනවා.
මාර්ෂල් ගුණවර්ධන කියල කෙනෙක් මේ සඟරා වෙනුවෙන් ඉංග්‍රීසි පොත් සිංහලට හරවනවා. කාම නිල කියල පරිවර්තනය කරන මේ පොත් පිංචෙ ඔරිජිනල් එක මොකක්ද ලේඛකයා කවුද කියල හොයාගන්න අමාරුයි. ඒ වගේම මහාචාර්ය එච් එස් ගැම්බර්ස්ගෙ මැරිටල් ඇක්ට් වගේ පොත් (1946) පවා පරිවර්තනය වෙනවා.
ඒ වගේම ගිහිගේ සඟරාවට ආවේණික ජ්‍යොතිෂ, මිත්‍යා ශාංගාර සංකලනයත් අඛණ්ඩව කරගෙන එනවා.
